Былы прэзідэнт Міжнароднай федэрацыі хакея Рэнэ Фазэль стаў асноўным уладальнікам буйнога расійскага вытворцы яблык, паведамляе агенцтва «Інтэрфакс». Прытым ён атрымаў расійскае грамадзянства.
Па звестках расійскага Адзінага дзяржаўнага рэестра юрыдычных асоб (ЕГРЮЛ), на мінулым тыдні Фазэлю перайшла доля ў памеры 54% у ТАА «Алма Холдынг».
Да гэтага часу аналагічны пакет быў на балансе швейцарскай Procuri S. A., астатнія 46% належаць «Волга груп Агра», якая ўваходзіць у «Волга груп» прадпрымальніка Генадзя Цімчанкі, сябра Уладзіміра Пуціна.
«Алма» займаецца вырошчваннем яблык прэміум-класу па інтэнсіўнай тэхналогіі ў Краснадарскім краі. Ёй належыць амаль 400 га садоў.
Па звестках ЕГРЮЛ, на гэты момант Рэнэ Фазэль з'яўляецца грамадзянінам Расіі.
Як індывідуальны прадпрымальнік, ён унесены ў расійскі Адзіны дзяржаўны рэестр (ЕГРИП) у студзені 2022-га.
Фазэль узначальваў ІІХФ з 1994 года па 2021-ы, гэта ў гісторыі гэтага віду спорту цэлая эпоха. Займаючы гэтую пасаду, ён сябраваў не толькі з Пуціным, але і з Лукашэнкам, з-за чаго ўсяляк супраціўляўся ў 2021 годзе пазбаўленню лукашэнкаўскага рэжыму права прымаць у Мінску часткі чэмпіянату свету. Толькі кансалідаваная пазіцыя асноўных спонсараў чэмпіянату дала магчымасць прыняць гэтае непрыемнае для Лукашэнкі рашэнне.
Нямала гэтаму паспрыяў сам Лукашэнка, які прыезд Фазэля ў Мінск на пачатку 2021 года ператварыў у прапагандысцкае шоў з дэманстратыўнымі абдымкамі на камеры. Акрамя таго, Фазэль таксама цёпла сустрэўся і сфатаграваўся з тагачасным кіраўніком Федэрацыі хакея Беларусі Дзмітрыем Баскавым, якога небеспадстаўна абвінавачваюць у датычнасці да забойства Рамана Бандарэнкі.
У выніку нават сам Фазэль урэшце не знайшоў магчымасцяў далей супраціўляцца агульнаму трэнду, а пазней нават прызнаў, што публічныя абдымкі з такой таксічнай фігурай, як Лукашэнка, былі самай вялікай памылкай у яго кар'еры.
Чытайце таксама:
Фазель: Ці былі абдымкі з дыктатарам Лукашэнкам самай вялікай памылкай у кар'еры? Так
Фазэль пра перамовы з Лукашэнкам: Далі зразумець, што ЧС немагчымы без змены палітычнай сітуацыі
Латушка: Ці запрасілі пана Фазэля на начное паляванне на стужачкі і мірных беларусаў?
Цяпер чытаюць
Сакратар Рады бяспекі заклікаў беларусаў устрымацца ад паездак у Расію9
Каментары