Były prezident Mižnarodnaj fiederacyi chakieja Rene Fazel staŭ asnoŭnym uładalnikam bujnoha rasijskaha vytvorcy jabłyk, paviedamlaje ahienctva «Interfaks». Prytym jon atrymaŭ rasijskaje hramadzianstva.
Pa źviestkach rasijskaha Adzinaha dziaržaŭnaha rejestra jurydyčnych asob (JEHRIUŁ), na minułym tydni Fazelu pierajšła dola ŭ pamiery 54% u TAA «Ałma Chołdynh».
Da hetaha času anałahičny pakiet byŭ na bałansie šviejcarskaj Procuri S. A., astatnija 46% naležać «Vołha hrup Ahra», jakaja ŭvachodzić u «Vołha hrup» pradprymalnika Hienadzia Cimčanki, siabra Uładzimira Pucina.
«Ałma» zajmajecca vyroščvańniem jabłyk premium-kłasu pa intensiŭnaj technałohii ŭ Krasnadarskim krai. Joj naležyć amal 400 ha sadoŭ.
Pa źviestkach JEHRIUŁ, na hety momant Rene Fazel źjaŭlajecca hramadzianinam Rasii.
Jak indyvidualny pradprymalnik, jon uniesieny ŭ rasijski Adziny dziaržaŭny rejestr (JEHRIP) u studzieni 2022-ha.
Fazel uznačalvaŭ IICHF z 1994 hoda pa 2021-y, heta ŭ historyi hetaha vidu sportu cełaja epocha. Zajmajučy hetuju pasadu, jon siabravaŭ nie tolki z Pucinym, ale i z Łukašenkam, z-za čaho ŭsialak supraciŭlaŭsia ŭ 2021 hodzie pazbaŭleńniu łukašenkaŭskaha režymu prava prymać u Minsku častki čempijanatu śvietu. Tolki kansalidavanaja pazicyja asnoŭnych sponsaraŭ čempijanatu dała mahčymaść pryniać hetaje niepryjemnaje dla Łukašenki rašeńnie.
Niamała hetamu paspryjaŭ sam Łukašenka, jaki pryjezd Fazela ŭ Minsk na pačatku 2021 hoda pieratvaryŭ u prapahandysckaje šoŭ z demanstratyŭnymi abdymkami na kamiery. Akramia taho, Fazel taksama ciopła sustreŭsia i sfatahravaŭsia z tahačasnym kiraŭnikom Fiederacyi chakieja Biełarusi Dźmitryjem Baskavym, jakoha niebiespadstaŭna abvinavačvajuć u datyčnaści da zabojstva Ramana Bandarenki.
U vyniku navat sam Fazel urešcie nie znajšoŭ mahčymaściaŭ dalej supraciŭlacca ahulnamu trendu, a paźniej navat pryznaŭ, što publičnyja abdymki z takoj taksičnaj fihuraj, jak Łukašenka, byli samaj vialikaj pamyłkaj u jaho karjery.
Čytajcie taksama:
Faziel: Ci byli abdymki z dyktataram Łukašenkam samaj vialikaj pamyłkaj u karjery? Tak
Fazel pra pieramovy z Łukašenkam: Dali zrazumieć, što ČS niemahčymy bieź źmieny palityčnaj situacyi
Łatuška: Ci zaprasili pana Fazela na načnoje palavańnie na stužački i mirnych biełarusaŭ?
Ciapier čytajuć
Biełarus palacieŭ u Nicu praz Stambuł — ciapier jon u komie ŭ francuzskaj balnicy. Miascovyja miedyki rajać adklučać jaho5
Kamientary