Брытанская разведка: Страты Расіі пры абстрэле ПТВ у Макееўцы перавысілі 300 чалавек
У штодзённай зводцы брытанскай разведкі ў суботу сцвярджаецца, што загінулых вайскоўцаў пры абстрэле ПТВ у Макееўцы было значна больш, чым прызналі расійскія ўлады.
Страты Расіі ў выніку ўдару 1 студзеня па будынку, дзе размяшчаліся вайскоўцы, у Макееўцы пад Данецкам, хутчэй за ўсё, перавысілі 300 чалавек. Паводле ацэнак брытанскай выведкі, большасць з іх былі забітыя або прапалі без вестак, а не атрымалі раненні;
Пасля ўдару Мінабароны Расіі пайшло на рэдкі крок і публічна прызнала, што панесла страты, заявіўшы пра 89 забітых.
Верагодна, расійскія чыноўнікі, сутыкнуўшыся з хваляй крытыкі на адрас расійскага камандавання, палічылі, што ўхіляцца ад афіцыйных заяў у сувязі з гэтым інцыдэнтам немэтазгодна;
На думку аўтараў зводкі, розніца паміж колькасцю ахвяр, прызнаных Расіяй, і верагоднай сапраўднай колькасцю ахвяр падкрэслівае паўсюдную прысутнасць дэзынфармацыі ў публічных заявах расійскіх уладаў;
Як правіла, гэта адбываецца ў выніку спалучэння заведама непраўдзівых заяў, адобраных вышэйшым кіраўніцтвам, і распаўсюджвання недакладных звестак малодшымі службовымі асобамі, якія імкнуцца зменшыць свае прамашкі.
Раней на аснове адкрытых крыніц Бі-бі-сі ўдалося ўстанавіць імёны 92 расійскіх вайскоўцаў, якія загінулі пры абстрэле ПТВ у Макееўцы побач з Данецкам. Гэта на тры чалавекі больш, чым лічба загінулых, названая Мінабароны Расіі. Сем'і яшчэ прынамсі 16 вайскоўцаў не могуць знайсці іх ні сярод мёртвых, ні сярод жывых.
Каментары