Шкляраў — украінцам: «Прызнанне Ціханоўскай — гэта сімвал. Але ці не ў цяперашнія гераічныя часы сімвалы важныя як ніколі?»
Палітычны кансультант Віталь Шкляраў на сайце «Украінскай праўды» напісаў калонку, чаму Украіне варта прызнаць Святлану Ціханоўскую прэзідэнтам Новай Беларусі.
Шкляраў цытуе розных украінскіх палітыкаў аб Святлане Ціханоўскай, нібыта яе няяснай пазіцыі, а таксама прыводзіць амаль два дзясяткі яе выказванняў за паўтара года, дзе Ціханоўская ясна акрэслівае сваю пазіцыю адносна Украіны і вайны Расіі.
«Святлана Ціханоўская паслядоўна і непахісна адстойвае бок Украіны ў вайне, безумоўна, прызнае правату Украіны і злачынны характар пуцінска-расійскай і лукашэнкаўска-беларускай агрэсіі. Яна рабіла гэта шмат разоў і рабіць не перастане.
Якія словы яшчэ не былі сказаны? Якія дакладна фармулёўкі павінны прагучаць, каб Украіна павярнулася тварам да свайго, магчыма, самага ўдзячнага саюзніка — Новай Беларусі, якая шчыра і люта ненавідзяць Пуціна, Лукашэнку і ўсю звязаную з імі нечалавечую брыдоту», — піша Віталь Шкляраў.
Ён упэўнены: ёсць высокая верагоднасць таго, што калі ўкраінскія афіцыйныя асобы нарэшце выйдуць на кантакт са Святланай Ціханоўскай і паведамяць, якія менавіта пытанні выклікаюць іх асцярогу, то ўсе непаразуменні будуць вырашаныя ў самыя кароткія тэрміны.
«Калі ж Украіна працягне цурацца Святланы Ціханоўскай, гэта прывядзе толькі да яшчэ большага расколу і фрустрацыі, а галоўнае — не прынясе нікому, акрамя Пуціна і Лукашэнкі, ніякай карысці.
Так, прызнанне Ціханоўскай — гэта сімвал. Але ці не ў цяперашнія гераічныя часы сімвалы важныя як ніколі? Пакуль Пуцін важдаецца з мёртванароджанымі квазідзяржавамі «Наваросіі», мы разам маем магчымасць стварыць сапраўдную, сумленную і моцную дзяржаву — Новую Беларусь!
Паўнавартаснае прызнанне Украінай легітымнасці новай Беларусі і яе прэзідэнткі Святланы Ціханоўскай запусціць механізм такога прызнання па ўсёй Еўропе і па ўсім свеце. Гэта будзе сур'ёзны і моцны крок насустрач міласэрнасці і прымірэнню, узаемадапамозе і культурнай рэінтэграцыі».
«Пуцінскія фашысты нанеслі Украіне жорсткі, подлы ўдар. Але яна вытрымала, б'е ў адказ і моцна стаіць на нагах. Беларусь просіць вас — тых, у каго атрымалася: дапамагчы выпрастацца і ўстаць на поўны рост і нам! І тады мы таксама зможам біцца побач з вамі на поўную сілу», — рэзюмуе Віталь Шкляраў.
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача28
Каментары