Баранавіцкую газету Intex-press пазбавілі дзяржаўнай рэгістрацыі
Як стала вядома Беларускай асацыяцыі журналістаў, загад аб ануляванні пасведчання друкаванага СМІ падпісаў 30 чэрвеня 2022 года міністр інфармацыі Уладзімір Пярцоў.
У загадзе адзначаецца, што «выпуск друкаванага сродку масавай інфармацыі не ажыццяўляецца на працягу шасці месяцаў запар», як таго патрабуе закон, а таму пасведчанне аб дзяржаўнай рэгістрацыі СМІ, выдадзенае газеце Intex-press у 2009 годзе, анулюецца. Акрамя таго, выданне выключанае з Дзяржаўнага рэестра сродкаў масавай інфармацыі.
Газету Intex-press адмовіліся друкаваць у Беларускім доме друку ў маі 2021 года: тады выданне — упершыню за 26 гадоў — выйшла толькі ў электронным выглядзе. Далейшыя спробы знайсці друкарню поспеху не мелі.
Жорсткі прэсінг з боку ўладаў баранавіцкая незалежная газета адчула пасля публікацыі інтэрв'ю са Святланай Ціханоўскай, якое пазней прызналі «экстрэмісцкім матэрыялам». Пасля таго ад продажу выдання адмовіліся практычна ўсе буйныя гандлёвыя сеткі Баранавічаў, распаўсюджваць газету праз падпіску адмовілася РУП «Белпошта», скасаваў дамову і Брэсцкі філіял ГРУП «Белсаюздрук».
Таксама пры канцы 2021 года Міністэрства інфармацыі Беларусі абмежавала доступ да сайта intex-press.by. У адпаведным загадзе за подпісам міністра Уладзіміра Пярцова падставай для блакіроўкі інтэрнэт-рэсурса называюцца «парушэнні заканадаўства аб сродках масавай інфармацыі ў частцы размяшчэння інфармацыі, распаўсюджванне якой забароненае».
-
«У калоніі цанілі перадачы прапагандысткі Скабеевай». Былы палітвязень Яўген Меркіс расказаў, як выжываў за кратамі
-
Беларуска атрымала польскую візу, але не пачала па ёй ездзіць да закрыцця мяжы. Ці пусцяць яе цяпер у ЕС?
-
17-гадовая беларуска, затрыманая за запуск дрона ў Варшаве, прыехала ў Польшчу ўсяго некалькі дзён таму
Да «Дня народнага адзінства» памілавалі 25 чалавек4
Каментары