Завялі крымінальную справу па факце смерці Рамана Бандарэнкі. Але сілавікі нібыта не датычныя
Пра гэта сёння Генпракуратура паведаміла Алене Бандарэнка, маці маладога чалавека, піша Tut.by.
Алена Бандарэнка распавяла Tut.by, што сёння адбылася тэлефонная размова з прадстаўніком Генпракуратуры. Жанчыне паведамілі, што заведзена крымінальная справа па факце наўмыснага прычынення цяжкага цялеснага пашкоджання, што пацягнула па неасцярожнасці смерць яе сына.
Гаворка ідзе пра ч. 3 арт. 147 Крымінальнага кодэкса Беларусі. За гэтае злачынства прадугледжана пакаранне ў выглядзе пазбаўлення волі на тэрмін ад 5 да 15 гадоў.
Неўзабаве прэс-служба Генпракуратуры пацвердзіла гэтую інфармацыю ў афіцыйным рэлізе.
«Дачыненне супрацоўнікаў органаў унутраных спраў да прычынення Бандарэнкі Рамана Ігаравіча цялесных пашкоджанняў не ўстаноўлена».
На наступным тыдні, па словах Алены Бандарэнка, яе запрасілі ў Генпракуратуру аформіць неабходныя дакументы, каб яе нарэшце прызналі пацярпелай па справе.
«Прайшло тры месяцы пасля смерці Ромы…» — дадала жанчына.
***
31-гадовы Раман Бандарэнка, які жыў у раёне плошчы Перамен, памёр у бальніцы ўвечары 12 лістапада, пасля таго як яго спачатку загрузілі ў белы мікрааўтобус невядомыя, а затым даставілі ў Цэнтральнае РУУС і потым — у бальніцу з цяжкімі траўмамі.
На доктара БХМД Арцёма Сарокіна, які перадаў у СМІ звесткі аналізаў Рамана, і журналістку Tut.by Кацярыну Барысевіч распачатая крымінальная справа за выдаванне медыцынскай таямніцы. У пятніцу, 19 лютага, над імі ў Доме правасуддзя пачнецца суд. Ім пагражае да трох гадоў зняволення.
Каментары