Ледавік, які сышоў з Гімалаяў, разбурыў плаціну і выклікаў паводку ў штаце Утаракханд на поўначы Індыі.
Хоць вёскі ў затопленай даліне былі эвакуяваныя, месцазнаходжанне як мінімум 125 чалавек невядомае. Ратавальнікі ўжо выявілі целы сямі загінулых, піша ВВС.
У выратавальных работах удзельнічаюць сотні людзей, у тым ліку падраздзяленні паліцыі, арміі і вайсковыя верталёты.
Ледавік сышоў з гары Нандадэві, другой па вышыні вяршыні Індыі, якая ўваходзіць у горную сістэмы Гімалаяў.
Спусціўшыся па горных рэках, ён ударыў па плацінах двух гідраэлектрастанцый, што будуюцца. Адна з плацін разбураная.
Большасць зніклых — занятыя на гэтых будоўлях рабочыя.
Катастрофа адбылася ў аддаленым раёне, таму пакуль няма пэўнага адказу, што выклікала сход ледавіка.
Эксперты мяркуюць, што адной з прычын таго, што вялікія кавалкі лёду адламаліся ад масіву, можа быць пацяпленне і выкліканыя ім ападкі. Гэта магло выклікаць сход лавін з камянямі і брудам.
Эксперты таксама мяркуюць, што лавіна магла сысці на ледавіковае возера, калі такое было на яе шляху, і яно выйшла з берагоў.
Іншая версія — лавіна або апоўзень маглі сыходзіць у раку на працягу нейкага часу, пакуль яна не выйшла з берагоў.
Каментары