Днямі ў сацсетках і ананімных тэлеграм-каналах пачала распаўсюджвацца сумная гісторыя з Горак: нібыта ад каранавіруса памерлі муж з жонкай з розніцай у пару тыдняў. Насамрэч, усё было не зусім так — але не менш сумна.
Бухгалтарка аднаго з мясцовых прадпрыемстваў Святлана Ч. памерла літаральна праз два тыдні пасля свайго юбілея. 15 красавіка жанчына адсвяткавала 50-годдзе. У пачатку мая яе ўжо пахавалі.
«Ніякага каранавіруса ў яе не было, гэта хлусня. Так, Святлане стала кепска, але ў бальніцу яна не звярталася. Кашаль, тэмпература — гэтага не было. У выніку яна памерла, але хавалі ў адкрытай труне. У пасведчанні аб смерці стаіць ішэмічная хвароба сэрца», — кажуць сваякі.
Валер, муж жанчыны, перажыў яе ненадоўга. 23 мая ён памёр у магілёўскай бальніцы. Ад чаго — невядома.
«Яго паклалі, кажуць, спачатку ў горацкую бальніцу з пнеўманіяй, затым яму пагоршала, перавезлі ў Магілёў, — кажуць сваякі. — Там і памёр. Ці быў каранавірус, ад чаго ён памёр — ніхто не ведае».
Валер апошнія некалькі гадоў нідзе не працаваў, выпіваў. У Святланы ёсць ужо дарослая дачка ад першага шлюбу — але яна стасункаў з айчымам не падтрымлівала.
«Наша Ніва» звязалася з ёй, але дзяўчына адказала, што пахаваннем айчыма займацца не збіраецца. Кажа, у таго нібыта застаўся брат, праўда, з ім яна таксама не ў кантакце.
«Усё, што мы ведаем — ведаем па чутках. Так, Валер памёр. Але ж ніхто не ведае нават, ці забіраў хтосьці цела, ці прайшло ўжо пахаванне», — кажуць у Горках.
Цяпер чытаюць
Чацвёртую лінію мінскага метро павядуць у Дражню. А «Сляпянка» і «Даўгабродская» змянілі сваё месца3
Каментары