Што часцей за ўсё становіцца прычынай інсультаў да 45 гадоў

Ішэмічны інсульт у маладых людзей (18—45 гадоў) сустракаецца прыкладна ў 5—14% выпадкаў. Але яго прычыны ў маладых адрозніваюцца ад старэйшых. У маладых людзей вялікую ролю граюць неатэрасклератычныя хваробы сасудаў (гэта значыць не звязаныя з «забіваннем» сасудаў халестэрынам), апісвае загадчыца неўралагічнага аддзяленнея №1 Мінскага абласнога клінічнага шпіталя інвалідаў ВАВ імя П. М. Машэрава Святлана Кузьменка ў «Медыцынскім весніку».

Адна з самых частых прычын — гэта дыссекцыя артэрый (расслаенне сценкі сасуда). Гэта калі ўнутраная сценка артэрыі надрываецца, і кроў трапляе унутр сценкі, утвараючы гематому. У выніку сасуд звужаецца або нават закрываецца — і можа ўзнікнуць інсульт.

Асноўная прычына, чаму гэта здараецца, — слабасць сценак сасудаў (часта генетычная).

Але ёсць і фактары, якія могуць справакаваць праблему.

Траўма галавы і шыі, празмерны рэзкі паварот галавы, закідванне галавы і яе нязручнае становішча (сіндром «салона прыгажосці»), заняткі некаторымі відамі спорту (плаванне), доўгая размова па мабільным тэлефоне, калі апарат утрымліваецца плячом, нязручнае палажэнне галавы падчас сну. 

Таксама ў пераліку інтубацыйны наркоз, мануальная тэрапія, інтэнсіўныя намаганні падчас родаў.

Апісаны выпадкі расслаення сценкі сасуда пры фізічным напружанні падчас кашлю, ваніт, узняцця цяжару. Разам з тым варта разумець, што гэтыя фактары прыводзяць да пашкоджання сасудзістай сценкі толькі пры яе слабасці.

Вірусы таксама могуць аслабляць сасуды.

Часцей пакутуюць унутраная сонная артэрыя і пазваночная артэрыя.

Прыводзіцца такая гісторыя, якая адбылася з 28‑гадовым мужчынам-айцішнікам. Ён паступіў у бальніцу са скаргамі на галавакружэнне, хісткую хаду, здранцвенне ў руках і нагах, прыступы кароткачасовага парушэння маўлення, памяці. Напярэдадні падчас прагулкі паслізнуўся, упаў і ўдарыў левым плячом шыю, прытомнасць не страціў, пасля чаго адчуў здранцвенне языка, кароткачасовае галавакружэнне, млоснасць, былі ваніты, парушылася маўленне. Сімптомы праз 10‑15 хвілін прайшлі, таму па медыцынскую дапамогу мужчына адразу не звяртаўся. А праз дзень сімптомы паўтарыліся, і ён паехаў у бальніцу. Яго шпіталізавалі па экстраных паказаннях. У анамнезе мужчыны — артэрыяльная гіпертэнзія, рэдкія прастудныя захворванні.

У яго быў вельмі рэдкі выпадак — адразу некалькі артэрый былі пашкоджаныя.

• 3
• 0
• 0
• 2
• 10
• 11
• 1
• 0