Аўтамабіль журналістаў перад трагедыяй рухаўся ў калоне з двух машын. Гэта вынікае з інфармацыі, якую атрымала з ЦАР група па расследаванні абставінаў гібелі Архана Джэмаля, Аляксандра Растаргуева і Кірыла Радчанкі, створаная Міхаілам Хадаркоўскім, паведамляе «МБХ Медыя».
Машына, у якой былі трое расейцаў і мясцовы кіроўца, ішла другой. Першы аўтамабіль забойцы, якія знаходзіліся ў засадзе, прапусцілі і мэтаскіравана напалі на машыну з журналістамі.
Правілы, складзеныя спецыялістамі ААН, класіфікуюць дарогі Цэнтральнаафрыканскай рэспублікі па трох катэгорыях - па ступені іх бяспекі.
Па дарогах «чырвонага», найвышэйшага ўзроўню пагрозы, рух магчыма толькі ў суправаджэнні ваеннага эскорту. Пры гэтым усе, хто едзе, павінны быць у шлемах і бронекамізэльках.
Падчас руху па дарогах «аранжавага» ўзроўню няма патрабаванняў падарожнічаць з узброеным эскортам. Шлемы і бронекамізэлькі павінны быць у наяўнасці ў аўтатранспарце, але іх нашэнне не абавязкова.
Пры руху па дарогах «зялёнага» ўзроўню патрабаванні мець бронекамізэлькі і шлемы адсутнічаюць.
На дарогах ўсіх трох узроўняў - «чырвонага», «аранжавага» і «зялёнага» - рэкамендавана перасоўвацца групамі з мінімум дзвюх машын. Пры гэтым у кожнай машыне павінна быць не менш за двух чалавек.
Расійская здымачная група падчас паездкі па дарогах ЦАР 30 ліпеня амаль увесь час ехала дарогамі «зялёнага» ўзроўню. Толькі на выездзе з горада Сібю машына заехала на дарогу «аранжавага» ўзроўню пагрозы.
На думку крыніц групы ў ЦАР, журналісты вырашылі аб'яднацца з яшчэ адным аўтамабілем, згодна з правіламі бяспекі. Пакуль невядома, хто ехаў у аўтамабілі, які злачынцы вырашылі прапусціць. Гэтак жа невядома, чаму журналісты вырашылі змяніць першапачатковы маршрут.
Журналісты Архан Джэмаль, рэжысёр Аляксандр Растаргуеў і аператар Кірыл Радчанка былі забітыя ў Цэнтральнаафрыканскай Рэспубліцы на пад'ездзе да транспартнага вузла Сібю 30 ліпеня. Расейцы працавалі над расследаваннем «Расійскія найміты» аб прыватнай ваеннай кампаніі Вагнера.
Каментары