У дачыненні да 35-гадовага індывідуальнага прадпрымальніка з Вілейкі распачата крымінальная справа за выкарыстанне прымусовай працы, паведамляе прэс-служба УУС Мінаблвыканкама.
Мужчына два гады пад пагрозай фізічнага гвалту прымушаў людзей працаваць на яго. Работнікі глядзелі яго свінней і трусоў, якіх той разводзіў у сваёй гаспадарцы.
Пра ўсё гэта стала вядома дзякуючы 30-гадоваму вяскоўцу, які ўцёк не толькі ад прадпрымальніка, але і з хаты. Супрацоўнікі міліцыі знайшлі мужчыну на вакзале ў Віцебску. Па яго словах, ён ехаў хоць куды, толькі б далей ад гэтага рабаўладальніка. Пра злыбеды ён і распавёў міліцыі.
Па словах мужчыны, два гады таму ён пачуў ад знаёмых, што прадпрымальнік з суседняй вёскі шукае работнікаў. Мужчына вырашыў паспрабаваць. Першыя паўгода ўсё ішло больш-менш нармальна: прадпрымальнік плаціў грошы і нават даваў вопратку. Але з цягам часу плаціў усё менш, а прыкладна з сярэдзіны 2016-га перастаў зусім. Гэта не спадабалася работнікам, і яны перасталі прыходзіць на працу. А вось гэта ўжо не спадабалася прадпрымальніку.
Бізнэсмэн ведаў, што адзін з яго былых работнікаў жыве ў суседняй вёсцы і праз пару дзён прыехаў да яго дадому, збіў, запіхаў у багажнік машыны і адвёз на ўчастак.
Там ён прымусіў мужчыну на сябе працаваць. За некалькі дзён ён настолькі запалохаў мужчыну і задушыў яго волю, што той проста баяўся не слухацца. Дапамогі не было, бо акрамя старэнькага бацькі блізкіх сваякоў не было, а аднавяскоўцы не хацелі лезці ў чужыя справы.
Часам мужчына спрабаваў пратэставаць, але ўсе яго спробы не выйсці на працу жорстка спыняліся прадпрымальнікам. Некалькі раз той прыкоўваў яго ланцугом у хляве і пакідаў на ноч. Урэшце мужчына не вытрымаў і збег.
Цяпер падазраваны знаходзіцца ў ізалятары часовага ўтрыманьня.
Аператыўнікамі сумесна са следчымі Вілейскага РАСК праводзяцца далейшыя следчыя мерапрыемствы, выяўляюцца іншыя пацярпелыя, бо па словах асноўнага пацярпелага, часам разам з ім працавалі і іншыя людзі, якіх прывозіў прадпрымальнік. Да іх ён таксама ставіўся жорстка і не плаціў грошай.
Пры ператрусе ў доме прадпрымальніка знайшлі дзве незарэгістраваныя паляўнічыя стрэльбы, а таксама мноства патронаў да гладкарульнай зброі.
-
У Пружанах са стралянінай затрымлівалі кіроўцу без правоў
-
«Дзяўчына недзе праз сем секунд ужо пікіравала без пілота». Сябар дэльтапланерыста, які разбіўся ў Строчыцах, расказаў, што прывяло да трагедыі
-
«Парваў сабе дыяфрагму і кішкі, наноў вучыўся хадзіць». Унук аўтара «Калыханкі» Васіля Раінчыка распавёў, як трапіў у страшную аварыю
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы74
Каментары