Кірмаш-распродаж вырабаў беларускіх майстроў адбудзецца ў мінскай кавярні-клубе «Грай» 18 снежня. У яго межах можна будзе набыць эксклюзіўныя падарункі да Калядаў і Новага года.
Аднак арганізатары мяркуюць зладзіць не толькі выставу-продаж, але і сапраўднае беларускае свята з калядным антуражам: традыцыйнымі і сярэднявечнымі беларускімі танцамі, забавамі, гульнямі, майстар-класамі, а таксама жывой музыкай. Адзін з пакояў «Грай» будзе адведзены пад настольныя гульні, апроч гэтага можна будзе навучыцца рабіць калядныя паштоўкі ў тэхніцы выцінанка.
Асобнай часткай праграмы будзе «Спеўны сход» Сержука Доўгушава, падчас якога ўсе прысутныя развучаць і выканаюць беларускія калядкі з розных рэгіёнаў.
Зрэшты, арганізатары прыгатавалі яшчэ шмат цікавостак, якіх пакуль не раскрываюць, але зазначаюць, што цікава на мерапрыемстве будзе і маладзёнам, і дзеткам, і людзям сталага веку.
«Мы чакаем наведнікаў сем'ямі, бо на нашым кірмашы прыемнае можна сумясціць з карысным: добра адпачыць, дазнацца болей пра адметныя беларускія калядныя традыцыі, а таксама парадаваць сябе і сваіх блізкіх сапраўды незвычайнымі рэчамі, зробленымі ў адзіным экземпляры», — кажуць яны.
Таксама на мерапрыемства можна будзе падсілкавацца традыцыйнымі беларускімі стравамі і набыць іх з сабой.
Адметнасць кірмашу яшчэ і ў тым, што ўсе тавары будуць прадавацца са зніжкамі.
Завершыцца імпрэза вялікім сольным канцэртам фолк-рок-гурту Re1ikt, які зусім нядаўна прэзентаваў свой новы альбом «Kufar».
Калядны handmade-кірмаш збярэ майстроў, якія займаюцца рознымі рамёствамі: ганчарствам, вырабам паштовак, рэчаў з дрэва, вышыўкай, ткацтвам, скрапбукінгам і інш.
Мерапрыемства пройдзе 18 снежня ў мінскай кавярні-клубе «Грай» (вул. Інтэрнацыянальная, 33) з 12 да 21 гадзіны.
Падрабязная інфармацыя ды праграма ў найбліжэйшы час з’явяцца тут.
Кошт уваходу на кірмаш-распродаж сімвалічны — усяго адзін беларускі рубель.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч10
Каментары