У Мінску адкрыўся V Міжнародны форум тэатральнага мастацтва «ТЭАРТ»

V Міжнародны форум тэатральнага мастацтва «ТЭАРТ» адкрыўся 29 верасня на сцэне Беларускага рэспубліканскага тэатра юнага гледача ў Мінску. 

Гэты форум з'яўляецца не толькі тэатральным святам Беларусі, але і «вялікай падзеяй для душы», зазначыла на цырымоніі адкрыцця «ТЭАРТА» першы намеснік міністра культуры Ірына Дрыга. «Для майстроў тэатра гэта магчымасць паглядзець на працу сваіх калег з блізкага і далёкага замежжа, абмяняцца ідэямі, а самае галоўнае — паказаць калегам дасягненні нашага нацыянальнага тэатральнага мастацтва», — сказала яна. 

Дрыга зачытала гасцям адкрыцця фестывалю прывітальнае слова міністра культуры Барыса Святлова, у якім той зазначыў, што «дзякуючы форуму «ТЭАРТ» кожны год восеньскай парой Мінск ператвараецца ў сапраўдны тэатральны цэнтр, дзе «чароўны свет сцэны раскрываецца ва ўсёй разнастайнасці, а тэатральная мова ўражвае сваімі раней невядомымі мастацкімі магчымасцямі». Міністр звярнуў увагу на тое, што з кожным годам колькасць беларускіх тэатраў, якія бяруць удзел у форуме, узрастае. 

У сваю чаргу старшыня праўлення ААТ «Белгазпрамбанк» Віктар Бабарыка нагадаў, што ў розныя гады банк падтрымліваў розныя праяўленні тэатральнага мастацтва, у тым ліку фестываль «Панарама» і «Тыдні з «Белгазпрамбанкам». 

«Мне здаецца, агульнае ва ўсіх гэтых рэчах — мы ўвесь час спрабавалі <…> данесці пасланне, — сказаў кіраўнік банка. — У прынцыпе, тэатр — гэта пасланне акцёраў, рэжысёраў, драматургаў гледачу… Першыя фестывалі былі вельмі цяжкія, таму што беларускі глядач убачыў непрывычны для яго тэатр. Сёння я кажу вялікі дзякуй беларускаму гледачу за тое, што ён гэта пасланне прыняў. Наступным этапам было пасланне спецыялістам тэатра. Тое, што на гэтым форуме прадстаўлены 13 беларускіх спектакляў, азначае, што і гэта пасланне было пачута». 

Бабарыка пажадаў прадстаўнікам беларускага тэатральнага мастацтва, каб наступны «ТЭАРТ» стаў «пасланнем ужо ўсяму свету». 

Спектаклем адкрыцця міжнароднай праграмы форуму стала швейцарская пастаноўка «Донка — пасланне Чэхаву» Даніэле Фінцы Паскі, які вядомы як рэжысёр цырымоніі закрыцця Алімпійскіх гульняў у Сочы і Турыне, пастаноўшчык «Цырка дзю Салей» і «Цырка Элуаз». Тэатральнае дзейства на сцэне мінскага ТЮГа ўвасобілі акцёры тэатра Compagnia Finzi Pasca, створанага ў 2011 годзе. Артысты развіваюць кірунак «пяшчотнага тэатра», для якога характэрны асаблівы стан лёгкасці. 

Праграму Belarus Open на сцэне Беларускага дзяржаўнага тэатра лялек адкрые чорная камедыя «Інтэрв'ю ў з вядзьмаркамі» Яўгена Карняга, а таксама тэатр танца Karakuli з пастаноўкай Vasen-Extasen. Усяго сёлета на форуме будуць паказаны 13 беларускіх пастановак — рэкордная колькасць за ўсе пяць гадоў існавання фестывалю. 

Да 23 кастрычніка аматары тэатральнага мастацтва ўбачаць 25 спектакляў калектываў з 11 краін — Беларусі, Бельгіі, Венгрыі, Германіі, Грузіі, Італіі, Латвіі, Расіі, Украіны, Швейцарыі і Японіі. 

Форум арганізаваны Цэнтрам візуальных і выканаўчых мастацтваў «Арт Карпарэйшн» і ААТ «Белгазпрамбанк» пры падтрымцы Міністэрства культуры Беларусі.

• 0
• 0
• 0
• 0
• 0
• 0
• 0
• 0