У Брэсцкую вобласць 13 красавіка з двухдзённым візітам прыбылі паслы 14 краін Еўрасаюза ў Беларусі. Як паведаміла журналістам кіраўнік прадстаўніцтва ЕС у Беларусі Майра Мора, мэта такіх паездак — наведванне аб'ектаў, якія фінансуе Еўрасаюз, і знаёмства з рэгіёнамі.
«Паслы мяняюцца. У Брэсцкай вобласці новы губернатар. Акрамя таго, такія візіты — яшчэ адно пацвярджэнне таму, што палітыка краін Еўрасаюза ў дачыненні да Беларусі і іншых краін адзіная», — адзначыла Мора.
Раніцай дыпламаты наведалі ў Брэсце ААТ «Савушкін прадукт», затым адбылася сустрэча з кіраўніцтвам вобласці.
Старшыня аблвыканкама Анатоль Ліс азнаёміў дыпламатаў з эканамічным развіццём рэгіёну. У прыватнасці, ён расказаў, што вобласць гандлюе са 124 краінамі. Па выніках 2014 года на долю краін Еўрасаюза прыпадала 25,5% тавараабароту.
«На жаль, тавараабарот нашага рэгіёну і краін Еўрасаюза паменшыўся і склаў да ўзроўню 2013 года 92%, за студзень—люты 2015-га — 65% да аналагічнага леташняга перыяду. Я не хацеў бы спыняцца на прычынах. Яны, у прынцыпе, вядомыя. Упэўнены, мы можам павялічыць наша ўзаемадзеянне. Брэсцкая вобласць адкрыта для плённага супрацоўніцтва ва ўсіх галінах эканомікі і сацыяльнай сферы», — сказаў Ліс.
У ходзе сустрэчы гаварылася аб неабходнасці найхутчэйшай рэалізацыі пагаднення аб малым прыгранічным руху з Польшчай, больш актыўным знаёмстве прадстаўнікоў дзелавых колаў з беларускімі ўмовамі вядзення бізнесу, рэкламаванні патэнцыялу рэгіёну, у тым ліку турыстычнага.
Дэлегацыя дыпламатаў наведала мемарыяльны комплекс «Брэсцкая крэпасць-герой», пункт пропуску «Пясчатка» на беларуска-польскай мяжы. Міжнародны праект «Будаўніцтва і аснашчэнне абсталяваннем аўтадарожнага пункту пропуску «Пясчатка» рэалізаваны ў межах Праграмы трансгранічнага супрацоўніцтва Еўрапейскага інструмента добрасуседства і партнёрства «Польшча — Беларусь — Украіна» на 2007—2013 гады. На рэалізацыю праекта Еўрапейскім саюзам выдзелена 10,9 млн еўра.
Паслы пабывалі ў Белавежскай пушчы. На 14 красавіка ў іх запланавана паездка ў Пружанскі і Івацэвіцкі раёны.
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне68
Каментары