Пры ўдзеле Ірыны Дарафеевай паставяць мюзікл пра беларускага Робін Гуда
Ці звязаны расейскі класік Аляксандр Пушкін з Беларуссю?
Пры адказе на гэтае пытанне звычайна ўзгадваюць яго двухразовае падарожжа па Беларускім тракце (спярша ў Адэсу, а потым у Міхайлаўскае), а таксама пра беларускія карані яго нянькі, Арыны Радзівонаўны. Але самы вядомы факт –
існаванне асобы, якая стала прататыпам галоўнага героя ў творы «Дуброўскі». Ім з’яўляўся небагаты беларускі шляхціц па прозвішчу Астроўскі.
Павел Нашчокін, сябра Пушкіна, расказаў яму гісторыю Астроўскага, «які меў працэс з суседам за зямлю, быў выцеснены з маёнтка, застаўшыся з аднымі сялянамі, стаў рабаваць спачатку паддзячых, потым і іншых».
Рэальны Астроўскі, як і Дуброўскі, быў вымушаны настаўнічаць у суседняга памешчыка. Пазней трапіў у астрог. Але збег адтуль і не быў адшуканы.
Да гэтай гісторыі звярнуўся кампазітар Кім Брэйтбург. Ён вядомы як аўтар музыкі да тэкстаў папсовых песняў, якія спяваюць прадстаўнікі расійскай эстрады. Яго мюзікл называецца «Дубрoffскі» і напісаны яшчэ ў 2010 годзе.
Летась у спявачкі Ірыны Дарафеевай, якая з’яўляецца загадчыцай кафедры мастацтва эстрады ў Беларускім дзяржаўным універсітэце культуры і мастацтваў, узнікла ідэя: замест таго каб займаць студэнтаў асобнымі практыкаваннямі, трэба, каб яны паўдзельнічалі ў пастаноўцы цэльнага твора.
Выбар спыніўся на «Дубрoffскім».
Рэжысёрам будзе Мікалай Андросаў, які ў 2011 годзе ставіў у Музычным тэатры «Блакітную камею», іншы мюзікл Брэйтбурга.
Прадзюсары праекта — сам кампазітар і Юрый Саваш, прадзюсар Дарафеевай.
У «Дубрoffскім» будуць занятыя каля 200 чалавек. Пераважная большасць з іх –- студэнты Універсітэта культуры і мастацтваў.
Прэм'ера запланавана на канец мая 2014 года.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Каментары