У часе расійскай авіяцыйнай атакі на тэрыторыю Украіны ноччу 29 чэрвеня разбіўся знішчальнік F-16, паведамілі ў Генштабе Украіны. 32-гадовы пілот Максім Усціменка адвёў самалёт ад населенага пункта, але катапультавацца не здолеў.
Паводле афіцыйных звестак, у выніку катастрофы загінуў пілот 1-га класа, падпалкоўнік Максім Усціменка, 1993 года нараджэння.
Камандаванне адзначае, што лётчык прымаў удзел у адбіцці масіраванага паветранага налёту і здолеў збіць сем паветраных цэляў. Паводле звестак вайскоўцаў, РФ запусціла ўначы больш за 500 паветраных цэляў.
Падчас знішчэння апошняй з іх самалёт быў пашкоджаны і страціў вышыню.
Усціменка паспеў адвесці F-16 ад населенага пункта, але катапультавацца не здолеў.
Гэта ўжо трэці страчаны ўкраінскі F-16 за апошнія тры месяцы: папярэднія катастрофы адбыліся ў красавіку і маі.
Паводле даступных звестак, з моманту атрымання Украінай знішчальнікаў F-16 у жніўні 2024 года, адбыліся тры авіякатастрофы з удзелам гэтых самалётаў. У дзвюх з іх загінулі пілоты.
26 жніўня 2024 года. Падпалкоўнік Аляксей Месь, вядомы пад пазыўным «Мунфіш», загінуў падчас адбіцця масіраванай расійскай ракетна-дронавай атакі. Ён знішчыў тры крылатыя ракеты і адзін ударны беспілотнік, але яго F-16 разбіўся. Паводле некаторых паведамленняў, прычынай катастрофы магло стаць «сяброўскі агонь» ад сістэмы Patriot, але афіцыйна гэта не пацверджана.
12 красавіка 2025 года. Капітан Павел Іваноў, 26 гадоў, загінуў падчас баявога вылету на F-16. Паводле паведамленняў, яго самалёт быў збіты расійскай ракетай.
16 мая 2025 года. Трэці F-16 быў страчаны падчас баявой місіі. Пілот своечасова катапультаваўся і застаўся жывы. Прычына катастрофы не называлася.
Такім чынам, па стане на чэрвень 2025 года, Украіна страціла чатыры самалёты F-16, у выніку чаго загінулі тры пілоты.
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі15
Каментары