На Дзень Волі адбылася сустрэча старшыні Рады БНР з міністрам замежных справаў Чэхіі
У Дзень Волі міністр замежных справаў Чэшскай Рэспублікі Карэл Шварцэнберг сустрэўся са старшынёй Рады БНР Івонкай Сурвілай. Адразу пасля сустрэчы Івонка Сурвіла дала інтэрв’ю радыё «Свабода».
— Івонка, якія галоўны вынікі перамоваў з кіраўніком чэшскага МЗС,
— Мы пачалі ад пытання незалежнасці Беларусі, згадалі дасягненне нашае леташняе — «Віленскі мемарандум» за незалежнасць, а таксама заўважылі, да якой ступені апазіцыя з’ядналася для падпісання гэтага вельмі важнага для нас дакумента. Закранулі тэму Расіі і яе ўплыву на Беларусь, было прыемна адчуць, што спадар Шварцэнберг вельмі добра гэтую праблему ўсведамляе. Гаварылі мы і пра шэнгенскія візы для грамадзянаў Беларусі. Спадар Шварцэнберг сказаў, што ў пытанні візаў фактычна не Еўропа супраціўляецца зніжэнню цаны і лібералізацыі візавага рэжыму, а Беларусь. І сказаў, што вельмі цяжка казаць пра супольную акцыю ў гэтай галіне, таму што некаторыя краіны хочуць рабіць выключна паводле ўзаемных дамоваў, і калі Еўропа да гэтага гатовая — Беларусь (маецца на ўвазе цяперашняе кіраўніцтва) супраціўляецца. І ў такой сітуацыі Еўропа сама па сабе вельмі мала можа зрабіць. Але ён гэта бярэ пад увагу і будзе гаварыць пра гэта з Еўропай.
— А што яшчэ дзеля падтрымкі дэмакратычных сіл у Беларусі можна зрабіць, пра што гаварыў спадар Шварцэнбэрг?
— Мы гаварылі пра палітычных вязняў, уздымалі пытанне акцыі супраць хакейнага чэмпіянату ў Мінску ў 2014 годзе. Таксама гаварылі пра фундацыю «Эразмус», Шварцэнберг казаў, што ён ужо доўга гэтым займаецца, што ён падтрымліваў і будзе падтрымліваць — з намерам дазволіць большай колькасці беларускіх студэнтаў атрымліваць стыпендыі ў Еўропе. Ну і апошні пункт, які мы закранулі, — гэта справа надання беларусам у Чэхіі статусу нацыянальнай меншасці, пра што ён таксама дакладна ведаў і гэтую прапанову ён таксама падтрымлівае.
Цяпер чытаюць
У рэстаране «Мак.бай» на загад Лукашэнкі перайменавалі амерыкана. Як назвалі?26
Каментары