Naviny haspadarskija

naviny haspadarskija

SUMIESNAJE AMERYKANSKA-BIEŁARUSKAJE ZAT “Brovar “Dziednava” budzie stvorana na bazie babrujskaha AAT “Dziednava”. Akcyjanerami stanuć amerykanskaja kampanija “Detroit Brewing Co” i babrujskija pivavary. Kantrolny pakiet novaha pradpryjemstva budzie naležać amerykancam. 4 vieraśnia prajekt uchvaliŭ kiraŭnik mahiloŭskaj vertykali Barys Batura.

PRYMAĆ BULBU buduć pa 170–190 rubloŭ za kh. U kramach jana budzie kaštavać na 30% bolej.

PRYVATNYM ASOBAM ZABARONIENA pieravozić pa terytoryi Biełarusi bolš za 100 ł benzynu i dyzpaliva aproč taho, što jość u bakach. Hetaja zabarona ŭviedzienaja admysłovym dekretam prezydenta i ŭchvalenaja Saŭminam. Štraf za parušeńnie – 50 bazavych vieličyniaŭ (555 tys. rubloŭ).

49 VAJSKOVYCH HARADKOŬ pieradaść Ministerstva abarony na balans miascovych vykankamaŭ, a taksama ministerstvaŭ i viedamstvaŭ da kanca 2002 h. 20 haradkoŭ pieradadzienyja ŭžo ŭ kamunalnuju ŭłasnaść.

10 MŁN. JUANIAŬ (kala 1,2 młn. dalaraŭ) – pamier biazvypłatnaj dapamohi Biełarusi ad uradu Kitaju. Adpaviednaja damova była padpisanaja padčas vizytu ŭ Miensk uradavaj delehacyi KNR.

BIEŁARUSKAJA DAI ŭviała novyja staŭki: kab atrymać pa-za čarhoj dziaržaŭnyja rehistracyjnyja znaki z žadanaj kambinacyjaj ličbaŭ, daviadziecca zapłacić 200 dalaraŭ. Za dazvoł na ekspluatacyju mašynaŭ z tanavanym škłom pryvatnaja asoba musić vykłaści 350 dalaraŭ, jurydyčnaja – 550.

NACYJANALNY PARK “BIEŁAJA RUŚ” płoščaj 25 tys. ha planujecca adkryć na terytoryi Łahojskaha rajonu ŭ 2003 h. Park budzie spryjać raźvićciu ŭ Biełarusi ekalahičnaha turyzmu.

ZAROBKI BIUDŽETNIKAŬ vyrastuć na 10%. Z 1 vieraśnia najmienšaja taryfnaja staŭka padvysiłasia z 19500 da 23200, a bazavaja vieličynia – ad 10 da 11,1 tys. rubloŭ. Nastupnaje padvyšeńnie zarobkaŭ urad planuje na śniežań.

10 TYS. ABLIHACYJAŬ naminalnaj vartaściu 100 dalaraŭ miarkuje vypuścić Nacbank. Nabyć ich možna budzie z 30 vieraśnia jak za dalary, tak i za rubli pa aficyjnym kursie na dzień prodažu. Termin abaračeńnia ablihacyjaŭ – hod.

RADYJOTELEVIZIJNAJA STANCYJA pačała pracavać u pasiołku Abuchova na Aršančynie. Jana budzie absłuhoŭvać Aršanski, Sieńnienski, Dubrovienski j Tałačynski rajony.

MAŁAKO Ź JODAM dla žycharoŭ zabrudžanych čarnobylskich terytoryjaŭ pačało vypuskać homielskaje abjadnańnie “Małočnyja pradukty”.

VYTVORCU NAJLEPŠAHA KAMPUTARA siarod biełaruskich kampanijaŭ, što vypuskajuć vyličalnuju techniku, abiaruć u časie vystavy “PTS-2002” u listapadzie.

KAMUNALNYJA TARYFY pabolšali na 3,3%. Ciapier za standartnuju adnapakajoŭku treba płacić 9,1, za dvuchpakajoŭku – 13,3, za trochpakajoŭku – 17,7 dalara ŭ miesiac. Z aciapleńniem płacić daviadziecca bolej – adpaviedna 16, 23,8 i 32,7 dalara.

UKŁADNIKAM “BIEŁKAMBANKU”, jaki zbankrutavaŭ, spłačvajuć kampensacyi da 1 kastryčnika. Paźniej viarnuć svaje hrošy možna budzie tolki praz sud.

KAŁHASAM I PTUŠKAFABRYKAM śpišuć 48 młrd. rubloŭ i 14,5 młn. dalaraŭ raniejšych pazykaŭ. Aproč taho, kamercyjnyja banki daduć sielskaj haspadarcy 50 młrd. rubloŭ novych kredytaŭ na narychtoŭku zbožžavych karmoŭ. Kampensavać straty bankaŭ budzie mienski biudžet.

ČYSTYJA ZAMIEŽNYJA AKTYVY Nacbanku ad pačatku 2002 h. skaracilisia na 19,9% i składajuć ciapier 694,2 młn. dalaraŭ (na 1 studzienia było 743,7 młn. dalaraŭ), zamiežnyja pasivy – 423,7 młn. dalaraŭ (na 1 studzienia – 405,9 młn. dalaraŭ).

S.I., Arkadź Šanski

“Biełarusaŭ” buduć źbirać va Ŭkrainie

Linija zborki traktaroŭ “Biełarus” adkryłasia na bazie AT “Zavod “Leninskaja kuźnia” ŭ Čarnihavie. Da kanca hodu Mienski traktarny zavod pastavić va Ŭkrainu 600 traktarakamplektaŭ. Naleta pastaŭki vyrastuć. Ruchaviki dla traktaroŭ buduć źbirać na Navahrad-Vałynskim aŭtaahrehatnym zavodzie. Da kanca 2002 h. tam budzie sabrana 300—400 ruchavikoŭ. U Kijevie ž raspačniecca zborka niedarahoj biełaruskaj sielhastechniki. Planujecca naładzić taksama harantyjnaje dy servisnaje absłuhoŭvańnie techniki.

Biespracoŭnyja chavajucca

Za žnivień u Biełarusi na 4,7 tys. paboleła biespracoŭnych. Na pieršym miescy Viciebskaja i Mahiloŭskaja vobłaści (pa 21 tys. čałaviek), najmienš biespracoŭnych na Haradzienščynie (14,5 tys.). Ahułam “niezaniataje ŭ ekanomicy pracazdolnaje nasielnictva” Biełarusi składaje kala 840 tys. čałaviek. U dziaržaŭnaj słužbie zaniataści zarehistravana tolki 124 tys. Ludzi nia chočuć rehistravacca, bo dapamoha pa biespracoŭi składała na 1 žniŭnia 16,4 tys. rubloŭ. A kab jaje atrymać, čałaviek musić brać udzieł u hramadzkich pracach (prybirać terytoryi j inš.).

Damiejkaŭ rubiel

Manety z vyjavaj Ihnata Damiejki ŭvioŭ u abarot Nacbank. Było adbita dźvie tysiačy miedna-nikielevych rubloŭ i tysiača srebnych dvaccacirublovikaŭ.

Pastka dla ziudarbajtaraŭ

Haradzki sud Pinsku vyrašyŭ kanfiskavać 25 t zbožža, dva aŭtamabili i dva traktary ŭ kałhasa imia Lenina Drahičynskaha rajonu, paviedamiła radyjo “Svaboda”. Kiraŭnictva kałhasu abvinavačanaje ŭ spryjańni ŭkrainskim hramadzianam, jakija pierachodzili dziaržaŭnuju miažu pa-za punktam pamiežnaha kantrolu. Pinskija pamiežniki zatrymali kałhasny transpart, jaki źjechaŭ z asnoŭnaj aŭtamahistrali, kab nielehalnym čynam trapić va Ŭkrainu i paźbiehnuć mytnych vydatkaŭ za vyvaz zbožža. Štohod hramadzianie Ŭkrainy, jakija žyvuć na pamiežnych terytoryjach, šukajuć pracu ŭ kałhasach Bieraściejščyny. Ukraincy hatovyja atrymlivać zarobak zbožžam, bulbaj, burakami. Kiraŭnictva kałhasaŭ i ŭkraincy padpisali adpaviednyja damovy. Ale biełaruskija mytniki pierastali ličyć hetyja damovy zakonnymi i kanfiskoŭvajuć “zarobak” u dachod dziaržavy.

Hleb Chmialnicki. Pavodle BiełaPAN, radyjo “Svaboda”