Na tydni

Na tydni

Nieadolnaje žadańnie być sacyjał-demakratam

Žanočaja partyja “Nadzieja” Palevikovaj, sacyjał-demakraty Karala j “Hramada” Šuškieviča, jakija pryznačyli na 24 žniŭnia svoj abjadnaŭčy źjezd, sutykajucca z chitrykami ŭładaŭ i kalehaŭ z “Narodnaj hramady”. Try lidery zajavili pra heta na specyjalnaj presavaj kanferencyi. Valancina Palevikova vyjaviła, što pradstaŭniki FPB i siabry “Narodnaj hramady” jeździać pa rehijonach i ŭhavorvajuć siabroŭ “Nadziei” pravieści 17 žniŭnia alternatyŭny schod, kab pieraškodzić abjadnańniu. Dziŭna, čamu ŭsim tak chočacca być sacyjał-demakratami, kali papularnaść Žanočaj partyi pieravyšaje rejtynh usich sacyjał-demakratyčnych razam uziatych?

10 miljonaŭ na demakratyju

ZŠA štohod vydzialajuć da 10 młn. dalaraŭ na padtrymku demakratyčnych pieraŭtvareńniaŭ u Biełarusi, — deklaravaŭ namieśnik pamočnika dziaržsakratara ZŠA Styven Pajfer karespandentu BiełaPAN. Tyja krainy, jakija kročać pa šlachu demakratyzacyi i reformaŭ bolš upeŭniena, atrymlivajuć našmat bolšuju dapamohu, zaznačyŭ jon.

Hiermanovič zamiest Starykieviča

Doŭhaja historyja sa zvalnieńniem A.Starykieviča z pasady redaktara “Biełaruskaha času” skončyłasia valavym rašeńniem Ł.Kozika. Jon źniaŭ redaktara, pazycyja jakoha jamu nie padabałasia, biaz zhody na toje prezydyjumu FPB. V.a. hałoŭnaha redaktara stała Iryna Hiermanovič, jakaja ciapier pracuje namieśnikam hałoŭnaha redaktara, a raniej kiravała hazetaj. Narodny paet Biełarusi Hienadź Buraŭkin admoviŭsia zastavacca siabram redkalehii, pratestujučy suprać zvalnieńnia A.Starykieviča.

VVP vyras na 5,7%

Aficyjnaja statystyka adznačaje dalejšaje paskareńnie tempaŭ rostu VVP. Za pieršyja siem miesiacaŭ hodu jon vyras na 5,7% proci minułaha hodu. Tempy rostu za 6 miesiacaŭ aceńvalisia tolki ŭ 4,7%. Paskareńnie adbyłosia dziakujučy tamu, što raniej, čym letaś, sabrali zbožža. Miarkujecca, što pa vynikach hodu ličba budzie trochi nižejšaj.

Bai ŭ Čačenii

U susiedniaj Rasiei praciahvajecca vajna. 22 vajskoŭcy zahinuli za minuły tydzień u Čačenii. Usiaho z pačatku druhoje čačenskaje vajny zahinuli 4302 rasiejskija vajskoŭcy i milicyjanty, 12417 bajcoŭ paranienyja. Taksama zahinuła nia mienš za 15 tys. čačenskich partyzanaŭ i mirnych žycharoŭ.

ABV

U mienskim metro niaredka źjaŭlajucca biełaruskamoŭnyja reklamki kulturnych i infarmacyjnych praduktaŭ, sacyjalnaja reklama. A voś sietka kramaŭ reklamavała siabie pa-biełarusku ŭpieršyniu. Pijaneram stała “ABV” — miareža mahazynaŭ “Biellehpramu” ŭ stalicy. Biełarusizavaŭ reklamu svaich mabilnikaŭ “Samsunh”. Nacyjanalnuju kartu razyhryvaje i “Vełkam” u piku “MTS”. Pakul, adnak, nie zusim słušna.

paciarpiełyja za Biełaruś

Štrafami pa 100 tys. rubloŭ byli pakaranyja 2 žniŭnia haradzienskija žurnalisty Andrej Pačobut, Iryna Čarniaŭka i Andrej Pisalnik “za niezakonnaje znachodžańnie ŭ pamiežnaj zonie”. Žurnalisty pryjechali ŭ Bierastavicki rajon, kab aśviatlać razbureńnie carkvy, pabudavanaj Ivanam Spasiukom. Ich trymali ŭ pastarunku ŭsiu noč, a ŭrańni aštrafavali. 7 žniŭnia haradzienskaja sudździa Natalla Kozieł dała aktyvistcy “Maładoj hramady” Śviatłanie Niech 10 nočaŭ administracyjnaha aryštu za ŭdzieł u “Łancuhu nieabyjakavych ludziej”, jaki adbyŭsia 8 lipienia. S.Niech trymaje haładoŭku pratestu ŭ viaźnicy. 11 žniŭnia, padčas akcyi barysaŭskaj filii “Zubra”, skiravanaj u abaronu niedziaržaŭnaj presy, milicyjanty pasprabavali zatrymać Ihara Zakreŭskaha. Ale zastupilisia “zubroŭcy” dy karespandent radyjo “Svaboda” Aleś Mikałajčanka, i milicyjanty adpuścili chłopca.