U Polščy buduć sudzić 12 dropieraŭ — jany davali svaje rachunki machlaram dla vyvadu hrošaj. Siarod ich jość i biełarusy

U Polščy vystavili abvinavačvańni jašče 12 dropieram — tak nazyvajuć ludziej, jakija za płatu ci kamisiju dajuć svaje rachunki dla vyvadu hrošaj telefonnym machlaram. Usiaho pa bujnoj spravie, jakaja naličvaje 350 tamoŭ, prachodziać užo 188 abvinavačanych, paviedamlaje Most sa spasyłkaj na Rehijanalnuju prakuraturu Łodzi.

Pra 12 zatrymanych z apošniaj hrupy (heta 11 mužčyn i adna žančyna) viadoma, što heta ludzi va ŭzroście ad 19 da 56 hadoŭ, usie jany pryjechali ŭ Polšču ź inšych krain. Heta hramadzianie Hruzii, Małdovy, Biełarusi, Rasii i Ukrainy.

Ich rola, pa viersii śledstva, zvodziłasia da davańnia bankaŭskich rachunkaŭ telefonnym machlaram. Supracoŭniki padpolnych koł-centraŭ telefanavali achviaram i kazali, što ich srodki ŭ niebiaśpiecy, a kab vyratavać ich, treba pieravieści hrošy na techničny rachunak. Takimi «techničnymi» rachunkami i byli rachunki zamiežnikaŭ. Akramia taho, achviar pierakonvali brać bujnyja kredyty — nibyta dla taho, kab u budučyni, z-za straty kredytazdolnaści, złačyncy nie mahli aformić na ich imia inšyja pazyki. Kredytnyja srodki taksama pieravodzilisia na rachunki zamiežnikaŭ.

Praz kožny ź ich prachodziła ad 20 da 50 tysiač złotych (4800—12000 jeŭra) — a ŭ ahulnaj składanaści bolš za 280 tysiač złotych (66 tysiač jeŭra). Abvinavačanyja atrymlivali za apieracyi kamisiju ŭ pamiery 2-3% ad admyvanych sum.

Kali hrošy prychodzili na kartki dropieraŭ, pryznačanyja členy złačynnaj hrupy zdymali ich, vykarystoŭvajučy BLIK abo pieradadzienyja bankaŭskija kartki. Značnaja častka paźniej pieravodziłasia ŭ kryptavalutu.

Zakazčyki vychodzili na dropieraŭ, kali tyja adhukalisia na abjavy ab zarobku, u tym liku raźmieščanyja na adnym z sajtaŭ znajomstvaŭ. «Prymajučy «prapanovu supracoŭnictva», jany davali źviestki svaich rachunkaŭ, bankaŭskija kartki, a taksama kody i paroli, jakija zabiaśpiečvali da ich dostup. Jany taksama pavialičvali limity razavych źniaćciaŭ», — paviedamili ŭ prakuratury.

Usim 12 padazravanym vystaŭleny abvinavačvańni, źviazanyja z admyvańniem hrošaj. Im pahražaje pazbaŭleńnie voli na termin da 10 hadoŭ. Paśla dopytaŭ prakuror užyŭ da ich mieru strymańnia ŭ vyhladzie palicejskaha nahladu i zabarony na vyjezd z krainy z adnačasovym kanfiskavańniem pašpartoŭ. Taksama ŭ ich była kanfiskavanaja majomaść.

Usiaho pa bujnoj spravie prachodzić 188 abvinavačanych, ale jana raźvivajecca. Užo ŭstanoŭlena 104 paciarpiełych, jakich padmanuli ŭ ahulnaj składanaści na 8 młn złotych (1,9 młn jeŭra).

• 2
• 0
• 1
• 3
• 0
• 0
• 0
• 0