Sudovaja pieramoha “NN”
Vyšejšy haspadarčy sud admianiŭ papiaredžańnie, vyniesienaje “Našaj Nivie” prakuraturaj
Padstavaju dla papiaredžańnia stalisia materyjały ŭ №1 i 2 za hety hod. Pad rubrykaj “Dzie varta być” u №1 hazeta nadrukavała infarmacyju pra kaladnyja nabaženstvy ŭ stalicy. Prakuratura znajšła parušeńnie ŭ zhadcy pra słužbu Kryžaŭźvižanskaha prychodu aŭtakiefalnikaŭ u Kurapatach. U №2 prakuratura začapiłasia za Kaladnaje pasłańnie Ivana Spasiuka, byłoha protajareja Biełaruskaj pravasłaŭnaj carkvy Maskoŭskaha patryjarchatu, jaki, miž inšaha, pisaŭ, što “Biełaruskaja aŭtakiefalnaja pravasłaŭnaja carkva molicca, kab Hospad sahreŭ ciapłom našyja damy, umacavaŭ našaje zdaroŭje, vylečyŭ našyja spustošanyja dušy”. U hetych zhadkach pra Aŭtakiefaliju prakuratura ŭbačyła raspaŭsiudžvańnie infarmacyi ad imia niezarehistravanaj hramadzkaj arhanizacyi i publikacyju zaviedama niedakładnych źviestak. Redakcyja nie pahadziłasia z papiaredžańniem, paličyŭšy jaho idealahična matyvavanym. U pazovie my arhumentavali svajo mierkavańnie pałažeńniami Zakonu ab druku (nielha raspaŭsiudžvać źviestki tolki “ad imia” niezarehistravanaj arhanizacyi). Advakatka Taciana Stankievič z Centru pravavoj abarony žurnalistaŭ BAŽ padmacavała jaho dadatkovym abhruntavańniem, znajšoŭšy ŭ zakidzie prakuratury supiarečnaść nia tolki Zakonu ab druku, ale i Hramadzianskamu kodeksu (carkva — relihijnaja, a nie hramadzkaja arhanizacyja, a heta nie adno j toje samaje). Pradstaŭnik prakuratury Stanisłaŭ Novikaŭ u sudzie rabiŭ akcent na tym, što “aŭtakiefalnaja carkva — raskolnickaja arhanizacyja, dziejnaść jakoj nakiravanaja na razbureńnie idealahičnaha i duchoŭnaha miru ŭ respublicy”, a “Maskoŭskaja pravasłaŭnaja carkva — kateharyčny praciŭnik BAPC”. Sudździa Tamara Kitajeva vysłuchała baki i vyniesła rašeńnie: papiaredžańnie skasavać, a z prakuratury spahnać 200 tys. rubloŭ za sudovyja vydatki.
Pieramoha “NN” — važny precedent, jaki zamacoŭvaje dla ŚMI mahčymaść paviedamlać pra dziejnaść niezarehistravanych arhanizacyj.
Redakcyja
Kamientary