Naviny

 Naviny

Łukašenkavy pryznačeńni

Viktar Hajsionak, były ministar adukacyi, pryznačany pasłom Biełarusi ŭ Aŭstryi. Siarod inšych pryznačeńniaŭ kidajecca ŭ vočy padvyšeńnie Ŭładzimiera Ŭschopčyka, jaki braŭ šturmam vilenskuju televiežu ŭ 1991-m, u namieśniki ministra abarony. Pamianiajuć i kiraŭnika chakiejnaj federacyi: pra heta abvieściŭ ministar sportu Jaŭhien Vorsin. Raniej im byŭ kiraŭnik słužby biaśpieki prezydenta Ju.Barodzič, jaki ciapier pryznačany pradstaŭnikom KHB Biełarusi ŭ FSB Rasiei i ŭžo hod, jak žyvie ŭ Maskvie. «Ci možna, žyvučy ŭ inšaj dziaržavie, kiravać unutranymi spravami susiedniaj?» — zadaŭ na pres-kanferencyi pytańnie Ja.Vorsin.

Staŭka refinansavańnia źnižanaja

Nacbank źniziŭ jaje na 10%. Z 22 maja jana budzie 100% hadavych. Na pačatku hodu jana była 175% hadavych, adnak z 15 sakavika pačałosia jaje źnižeńnie, bo inflacyja mienšaje (5,1% za krasavik). Hetaja staŭka vyznačaje, pad jaki pracent pradpryjemstvy mohuć brać u bankach kredyty. Miž tym abjom vałavoha ŭnutranaha praduktu, vyrablenaha ŭ Biełarusi ŭ studzieni-krasaviku, akazaŭsia na 5% bolšy, čym letaś. U pramysłovaści rost na 6,1%, u sielskaj haspadarcy i na transparcie spad — na 8,5 i 14,4%. 33,9% pradpryjemstvaŭ stratnyja. Rentabelnaść pradukcyi źniziłasia z 13,9% letaś u hety peryjad da 9,5 sioleta.

Biady dadali prymarazki: zahinuła 14% pasiejanych azimych i 5% jaravych, šmat dzie pamierźli mnahaletnija travy i aharodnina.

Karolaka majuć vyvieźci

20 traŭnia skončyŭsia termin, jaki dali bieraściejskamu probašču Z.Karolaku na «dobraachvotny» vyjezd. 4 hady Kamitet pa spravach relihijaŭ admaŭlaŭ jamu ŭ pradaŭžeńni rehistracyi, adnak Karolak, jak i naležyć u takich vypadkach inšaziemcu, rehistravaŭsia ŭ adździele viz i rehistracyjaŭ raz na try dni, až pakul jamu nie zahadali vybiracca ŭ Polšču. Bieraściejskija kataliki praciahvajuć dyžuryć prosta ŭ kaściole, kab adstajać svajho ksiandza.

Pavodle infarmacyjaŭ BiełaPAN padrychtavaŭ B.T.

Zbližeńnie z narodam

Paśla šyroka adznačanaha ŭładami Dnia pieramohi i šyroka adznačanaje narodam Radaŭnicy 10 traŭnia na pracu nia vyjšli adrazu dva namieśniki staršyni Kryčaŭskaha rajvykankamu. M.Hierdzij prynios potym balničny list, a druhi, A.Lapieška, nijak nia zmoh apraŭdać prahuł. Dyk vymusili jaho napisać zajavu na zvalnieńnie pa asabistym žadańni. Zrazumieła, takoje niaznačnaje złačynstva nie mahło być pryčynaj dla zvalnieńnia. Mabyć, niešta tut jašče było.

Paśla hetaj značnaj dla Kryčava padziei stanovicca niejak radasna i ŭtulna — vychodzić, tyja, chto kiruje nami siońnia, vielmi blizkija da narodu. Bo čaściakom paśla roznych śviataŭ prostyja rabaciahi albo «chvarejuć», albo prahulvajuć pracu. A tut takija «vialikija» ludzi! Zbližeńnie z narodam u siońniašniaj ułady adbyvajecca nie na słovach, a na spravie.

A.K., Kryčaŭ

U Navapołacku źjavicca śmiećciezavod

U Navapołacku prablemu adkidaŭ planujuć vyrašyć z dapamohaj novaha pradpryjemstva, što musić źjavicca nieŭzabavie: u Naftahradzie pabudujuć śmiećciepierapracoŭčy zavod.

Sioleta miarkujuć skončyć padrychtoŭku prajektu, a z nastupnaha hodu za spravu voźmucca budaŭniki. Mer Navapołacku Alaksandar Kamaroŭ zajaviŭ, što ŭžo znajšłasia firma ź Niamieččyny, što zhadziłasia kredytavać budoŭlu. Kredyt heny niemcy dajuć na 15 hadoŭ pad małyja pracenty. Zavod budzie absłuhoŭvać Połacak z Navapołackam dy ŭvieś rajon.

Try hady turmy za žarcik

U Navapołacku dniami zasudzili «telefonnaha terarysta» — vučnia siomaje klasy SŠ №7. Ranicaj 23 sakavika ŭ 9.45 nieviadomy patelefanavaŭ u pryjomnuju navapołackaje SŠ №9 i paviedamiŭ, što ŭ budynku — bomba. Sakratarka škoły skiemiła, što hołas byŭ jak padletka 13—14 hadoŭ.

Terminova prybyła milicyja, pažarnyja, bryhada «Chutkaj dapamohi», sapiorna-piratechničnaja hrupa z vajskovaj častki z Połacku. Usich sa škoły (kala 700 čałaviek) evakujavali, budynak ačapili. Ale vybuchovych pryładaŭ u škole, jak zaŭždy, nie apynułasia. Nieŭzabavie milicejskija śledčyja «vyličyli» samoha žartaŭnika.

14-hadovy chłapčuk, nahledzieŭšysia televizii, vyrašyŭ pravieryć, ci aperatyŭna spracujuć ekstranyja słužby. Patelefanavaŭ u susiedniuju škołu (ich padzialaje jakich metraŭ 100) i z zadavalnieńniem naziraŭ, jak zavichajucca sapiory.

Ajčynnaje pravasudździe jaho zasudziła nie škadujučy, roŭna jak Čyhira: try hady pazbaŭleńnia voli z adterminoŭkaj vykanańnia prysudu na dva hady. Dyj rachunki ad haradzkich słužbaŭ jahonym baćkam pryjdziecca apłacić.

Andrej Alaksandraŭ, Navapołacak

Sadki začyniajucca

Mahiloŭski hihant industryi, abjadnańnie «Chimvałakno», začyniła 7 dziciačych sadkoŭ, u jakija chadziła kala 3000 dziaciej. Dyrekcyja tłumačyć svaje dziejańni niastačaj hrošaj. Nieapłočanyja rachunki pa ŭtrymańni sadkoŭ składajuć pad 150 miljonaŭ rubloŭ. «Chimvałakno», na jakim pracuje 20000 čałaviek, i samoje nie piruje.

Śmierć na vynas

Čerykaŭskija ŭłady dazvolili raźbirać i vykarystoŭvać pa novaj majomaść, što jašče zastałasia niekranutaja ŭ zabrudžanaj radyjacyjaj zonie. 10 hadoŭ tut trymali admysłovyja atrady achovy, dasyłali specyjalistaŭ, kab pastupova i biaz škody navakollu ŭtylizavać brudnuju majomaść. A ciapier vo jak. I paciakła radyjacyja z zony...

«Zenit» usio buntuje

Jašče adzin dyrektar mahiloŭskaha zavodu «Zenit» padtrymaŭ tradycyju, pavodle jakoj kožny ź ich praz hod pracy sychodzić u adstaŭku. Heta ŭžo čaćvierty adstaŭny kiraŭnik za apošnija 5 hadoŭ. Kožny raz heta źviazana ź niezadavolenaściu pracoŭnych jak stanam pradpryjemstva, tak i metadami kiravańnia: na zavodzie dziejničaje mocnaja supołka Svabodnaha prafsajuzu. Kožny novy dyrektar, prychodziačy na pracu, pačynaŭ z baraćby z prafsajuzam, ale rabočyja lidery vielmi chutka znachodzili šlachi zakonnaha supracivu. Kolišniaje abaronnaje pradpryjemstva žyvie nia lepšyja časy. Na «Zenicie» z sakavika ludzi čakajuć zarobku.

Symon Hłazštejn, Mahiloŭ

Rehijony chočuć bolšaha ŭdziełu

18—19 traŭnia ŭ Horadni adbyłasia narada pradstaŭnikoŭ rehijanalnych partyjnych, hramadzkich i prafsajuznych arhanizacyjaŭ demakratyčnaha charaktaru. Ź Viciebsku pryjechali Jazep Navumčyk i Vadzim Barščeŭski, z Homiela — Viktar Karnijenka, Aleh Hramyka, z Mahilova — Vital Vasilkoŭ i Anatol Fiodaraŭ; ź Lidy — Stanisłaŭ Sudnik, z Barysava — Anatol Askierka, z Maładečna — Aleś Kapucki, z Salihorsku — Mikałaj Dzialendzik, sa Słucku — Alaksandar Katlaroŭ. A sustrakali ŭsich Siamion Domaš, Siarhiej Malčyk, Alaksandar Milinkievič.

U vyniku pieramovaŭ utvaryli Kaardynacyjnuju Radu «Rehijanalnaja Biełaruś», kaardynataram jakoj abrali Siamiona Domaša, i Kaardynacyjnaj radzie Kanhresu Demakratyčnych Siłaŭ Biełarusi prapanavali ŭklučyć u svoj skład kiraŭnika «Rehijanalnaj Biełarusi». Chočuć dabicca, kab dumki rehijonaŭ pytalisia nakont usiaho, što rychtujuć demakratyčnyja siły ŭ stalicy.

Anton Łabovič, Horadnia

Chleb padaražeŭ

Na 30% padaražeŭ chleb zvyčajnych hatunkaŭ. Bo doraha abychodzicca kuplać na jaho zbožža za miažoj, tłumačać uva ŭradzie.

b.t.