Sport śpirtu nie tavaryš

Sport śpirtu nie tavaryš

Na Stolinščynie pasvarylisia dźvie miascovyja hazety — dziaržaŭnaja i pryvatnaja.

Alaksandar Ihnaciuk, jaki raniej pracavaŭ u redakcyi stolinskaj rajonki «Naviny Paleśsia», naprykancy minułaha hodu zasnavaŭ i zdoleŭ zarehistravać na Stolinščynie ŭłasnuju hazetu — «Viačerni Stolin», jakaja adrazu nabrała davoli vysoki ŭ hetym rehijonie nakład — kala 4,5 tysiačy asobnikaŭ. Novaja pryvatnaja hazeta pačała drukavać infarmacyju, jakaja vielmi adroźnivajecca ad aficyjnaj, i toje nie spadabałasia miascovamu načalstvu. Adnak adkrytych vypadaŭ suprać «Viačerniaha Stolina» dahetul nie było.

Niekalki tydniaŭ tamu ŭ «Navinach Paleśsia» źjaviŭsia artykuł pra rajonnyja spabornictvy pa nastolnym tenisie pad nazvaju «Pazajzdrościm». Pieršaje miesca ŭ spabornictvach zaniała prafinansavanaja «Viačernim Stolinam» kamanda z adnajmiennym nazovam. U svaim artykule «Naviny Paleśsia» dazvolili sabie vyrazy kštałtu «vyjhrali ihraki, jakich naniało za niadrennyja hrošy kiraŭnictva hazety «Viačerni Stolin», a taksama abvinavacili pieramožcaŭ u adsutnaści sumleńnia, jakoje tyja nibyta pradali za hrošy. U adkaz «Viačerni Stolin» na pieršaj pałasie nadrukavaŭ materyjał «Pazajzdrościm: «Viačerni Stolin» vybiraje sport, a «Naviny Paleśsia» — śpirt», a taksama fotazdymki, na jakich redaktarka aficyjnaj «rajonki» Valancina Miranovič pje «na bruderšaft» ź niejkim načalnikam, a taksama iznoŭ pje, ale ŭžo ŭ redakcyi — razam z kalehami. U svaim artykule redaktar Alaksandar Ihnaciuk adznačaje, što da apošniaha momantu nie chacieŭ svarycca i prasiŭ źmiaścić u adnym z numaroŭ «Navinaŭ Paleśsia» abviaržeńnie, bo nijakich vialikich hrošaj jon nasamreč nikomu nie płaciŭ, adno što vydatkavaŭ srodki, nieabchodnyja kamandzie pavodle aficyjnaha kaštarysu dziela ŭdziełu ŭ čempijanacie. Inačaj kamanda ŭvohule nie zmahła b uziać udzieł u spabornictvach. Adnak abviaržeńnie «Naviny Paleśsia» drukavać admovilisia.

Zasnavalnik niezaležnaj hazety ŭ bližejšy čas źbirajecca źviarnucca ŭ sud pa abaronu svajho honaru i spahnać z «Navinaŭ Paleśsia» niekalki miljonaŭ denaminavanych rubloŭ, jakija, sa słovaŭ redaktara, pojduć na ŭparadkavańnie futbolnaha stadyjonu ŭ Rečycy.

Minuła ŭžo bolš za dva tydni, a «Naviny Paleśsia» nivodnym radkom nie adreahavali na hučny artykuł kankurentaŭ.

Pakul nieviadoma, jak adreahujuć na heta stolinskija ŭłady, adnak vidavočna, što ciapier i ŭ rajonnaj hazety, i ŭ rajonnaj ułady źjaviłasia dobraja nahoda, kab pazbavicca i kankurenta, i vydańnia, jakoje nie baicca ŭzdymać niepryjemnyja dla «vertykali» prablemy.

Alaksiej Dzikavicki ź Pinsku