Luboŭ Kavalova atrymała siońnia list ź Viarchoŭnaha suda. Uviečary pra vykanańnie prysudu paviedamiła taksama ANT.
List ź Viarchoŭnaha suda z paviedamleńniem ab vykanańni prysudu atrymała maci Uładzisłava Kavalova. Heta byŭ zvyčajny list, navat nie zakazny, adpraŭleny 16 sakavika.
Daviedku dasłali na chatni adras Kavalovych u Viciebsku. List z paštovaj skryni dastała maci, Luboŭ Kavalova.
Havaryć jana nie moža — tolki płača.
«Vo tolki što mama sa skryni dastała. Viarchoŭny sud… ad 16.03 list… što prysud pryviedzieny da vykanańnia… Mama jaho atrymała. Jany jaho zabili, usio było daremna, usio daremna»,— kaža Taćciana, siastra Uładzisłava Kavalova.
14 sakavika stala viadoma, što Alaksandr Łukašenka nie pamiłavaŭ Uładzisłava Kavalova i Dźmitryja Kanavałava.
16 sakavika maci Kavalova razam z advakatam pieradali zajavy z prośbaj dać piśmovyja adkazy, dzie znachodzicca Uład, u izalatar KDB i ŭ Departamient vykanańnia pakarańniaŭ MUS. U DVP zajavu nie pryniali, skazali, što treba źviartacca ŭ Viarchoŭny sud.
30 listapada 2011 hoda Viarchoŭny sud Biełarusi pryznaŭ Uładzisłava Kavalova vinavatym u saŭdziele ŭ teraryźmie i prysudziŭ jaho da śmiarotnaha pakarańnia. 7 śniežnia asudžany padaŭ prašeńnie ab pamiłavańni na imia Alaksandra Łukašenki.
Dźmitryj Kanavałaŭ, taksama asudžany na śmiarotnaje pakarańnie pavodle abvinavačańnia ŭ teraryźmie pa hetaj kryminalnaj spravie (terakt u minskim mietro 11 krasavika 2011 h, u vyniku jakoha zahinuli i pamierli ad ran 15 čałaviek, 387 atrymali rany), prašeńnie ab pamiłavańni padavać admoviŭsia. Jak stała viadoma ŭviečary z paviedamleńnia ahienctva BiełTA i ANT, prysud u dačynieńni jaho taksama vykanany.
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie4
Kamientary