Za što čaćviora DAIšnikaŭ zatrymlivali kiroŭcu ŭ Homieli? — videa

Na roliku, vykładzienym u internecie, bačna, jak adrazu niekalki supracoŭnikaŭ DPS zatrymlivajuć žychara Homiela. U kanflikcie aktyŭna ŭdzielničajuć i minaki, jakija adciahvajuć «złačyncu» ŭbok. Ale pryčyna incydentu była nieviadomaj.

Pres-słužba DAI Homielskaj vobłaści zrabiła z hetaj nahody aficyjny kamientar:

«U niadzielu, 22 studzienia 2012 hoda… supracoŭnik DAI ŭbačyŭ hramadzian, jakija rasčyščali chodnik ad śnieha, vykidvajučy jaho na prajeznuju častku. Pa hukaŭzmacnialnaj pryładzie, ustalavanaj u aŭtamabili,

supracoŭnik DAI papiaredziŭ, što vykid śnieha na prajeznuju častku zabaronieny, i što za heta praduhledžana administracyjnaja adkaznaść.

Supracoŭnik DAI paŭtorna zrabiŭ zaŭvahu pa hukaŭzmacnialnaj pryładzie ŭ bolš patrabavalnaj formie, paśla vyjšaŭ z aŭtamabila, pradstaviŭsia i pačaŭ hutaryć z hramadzianami… Padčas hutarki małady mužčyna pavodziŭ siabie zadzirliva, razmaŭlaŭ na padvyšanych tonach, nieadnarazova demanstratyŭna vykazvaŭsia niecenzurnaj łajankaj. Na zaŭvahi supracoŭnika DAI mužčyna nijak nie reahavaŭ. U vyniku supracoŭnik DAI, rastłumačyŭšy hramadzianinu, što jaho dziejańni źjaŭlajucca supraćpraŭnymi i kvalifikujucca jak drobnaje chulihanstva, paprasiŭ jaho prajści ŭ słužbovy aŭtamabil… Mužčyna ŭ hrubaj formie kateharyčna admoviŭsia.

… Supracoŭnik DAI pa radyjostancyi pieradaŭ infarmacyju pra zdareńnie i vyklikaŭ dapamohu. Na miesca zdareńnia pryjechaŭ starejšy inśpiektar DPS DAI UUS Homielskaha abłvykankama. Na paŭtornuju prapanovu hramadzianinu sieści ŭ słužbovy aŭtamabil jon kateharyčna admoviŭsia i paspravaŭ pakinuć miesca ździajśnieńnia administracyjnaha pravaparušeńnia. Pry hetym mužčyna pačaŭ adšturchvać supracoŭnikaŭ milicyi, chapajučysia za ich abmundziravańnie.

U vyniku ŭ dačynieńni hramadzianina supracoŭniki DAI… byli vymušanyja ŭžyć fizičnuju siłu, a taksama śpiecyjalny srodak — naručniki.

U vyniku, jak paviedamili ŭ DAI, na žychara Homielu (1986 h. n.) było składziena try administracyjnyja pratakoły pa artykułach: «Paškodžańnie abo zabrudžvańnie aŭtamabilnaj darohi ci inšaha darožnaha zbudavańnia» (supracoŭnikam DAI), a taksama «Niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni im słužbovych paŭnamoctvaŭ» i «Drobnaje chulihanstva».

* * *

A voś hramadzianie majuć inšaje bačańnie situacyi.

Pavodle apoviedaŭ haspadyni budynka Taćciany Repič, jakaja ažyćciaŭlała pryborku, milicyja pryčapiłasia da hramadzianaŭ absalutna biespadstaŭna.

Taćciana Repič:

— My prybirali darohu. Na bardziury lažaŭ śnieh. Tamu atrymlivałasia tak, što kali kidali śnieh na hety vał, to kamiački lacieli ŭniz, to bok na darohu. U hety momant jechała milicejskaja mašyna i ŭ hukaŭzmacnialnik supracoŭnik DAI skazaŭ: «Nie kidajcie na darohu śnieh, chopić čyścić».

Supracoŭnik DAI papiaredziŭ haspadaroŭ doma, što jany buduć pryciahnutyja da administracyjnaj adkaznaści pa pryčynie taho, što nibyta zabrudzili aŭtadarohu. Dalej milicyjant vyjšaŭ z mašyny i prapanavaŭ synu spadaryni Taćciany prajechać u Druhoje adździaleńnie milicyi. Kali małady mužčyna admoviŭsia, kapitan vyklikaŭ kahości pa racyi na dapamohu. Vajskovy piensijanier Anatol Repič staŭ adnoj z achviaraŭ zakałotu.

Anatol Repič:

— Patrulnaja mašyna DAI ŭ hukaŭzmacnialnik kaža: «Chopić čyścić śnieh i kidać jaho na prajeznuju častku. Jon akurat spyniŭsia nasuprać mianie. Ja jamu kažu: vyjdzi z mašyny i pierakanajsia, kudy ja kidaju śnieh. Jon pačuŭ, vychodzić z mašyny i kaža: mnie niama da kaho tut padychodzić. Ja adreahavaŭ i syn taksama adreahavaŭ trochu ŭ hrubaj formie. Ale my što, nie ludzi? Nie skažu, što ŭsie supracoŭniki DAI — niahodniki. Siarod milicyjantaŭ, pierakanany, vielmi šmat hodnych ludziej. Ja sutykaŭsia z takimi i pa pracy, i prosta tak. Zaŭždy pytańni vyrašalisia, usio było dobra. Ale, jak kažuć, niama rodu biez vyrodu.

Potym niadkul źjavilisia kala 9 milicyjantaŭ. Jany nakinulisia na haspadaroŭ doma i pačali źbivać ludziej. Na małodšaha Repiča čatyry milicyjanty apranali kajdanki. Śviedkaj raspravy nad svaim mužam stała nastaŭnica anhlijskaj movy Jaŭhienija Repič.

«Ja była ŭ šoku ad taho, što dziejecca. My ž nie złačyncy jakija, što ździajśniajuć pravaparušeńnie. My pracavali ŭsioj siamjoj, kab ludziam było narmalna chadzić. Ja b nikoli raniej nie padumała, što milicyja moža pavodzić siabie takim čynam», — padzialiłasia ŭražańniami ad zdareńnia Jaŭhienija Repič. Dziaŭčynie ad usiaho ŭbačanaha stała kiepska. Na videa bačna, jak jana straciła prytomnaść. Potym Jaŭhieniju zanieśli ŭ chatu vypadkovyja minaki, što apynulisia pobač.

Jak raspavioŭ Anatol Repič, jon prasiŭ ludziej u formie nie załamvać jamu ruki, bo maje prablemy z chrabtom. Ale pravaachoŭniki praciahvali źbivać i łupcavać hramadzianina pa nazie, sprabujučy pavalić na ziamlu.

«Ja sustrakaŭsia z kiraŭnictvam homielskaj DAI. Usie adekvatnyja i vielmi pryjaznyja ludzi. Kiraŭnictva pastajanna vybačałasia za pavodziny padnačalenych. Ja spadziajusia, što spraviadlivaść budzie. Biezadkaznych milicyjantaŭ, jakija pieravysili słužbovyja paŭnamoctvy, treba pakarać», — zaŭvažyŭ Anatol Repič.

• 0
• 0
• 0
• 0
• 0
• 0
• 0
• 0