Prakuratura zacikaviłasia rekanstrukcyjaj «Muraŭjoŭ-hatela»

Prakuratura Hrodzienskaj vobłaści vyśvietliła, što ŭładalnik staradaŭniaha budynka ŭ centry Hrodna parušaje achoŭnyja abaviazańni ŭ dačynieńni da byłoha doma kupca Muraŭjova. Raboty pa rekanstrukcyi prypynienyja, budynak padviarhajecca niebiaśpiecy razbureńnia.

U aficyjnym papiaredžańni ab niedapuščalnaści parušeńnia zakona havorycca: «…vyśvietlena, što AAT „Biełaruski narodny strachavy piensijny fond“ parušaje patrabavańni art. 28 Zakona RB „Ab achovie historyka-kulturnaj spadčyny RB“, a taksama patrabavańni achoŭnaha abaviazańnia na historyka-kulturnuju kaštoŭnaść — budynak na płoščy Savieckaj, 2… (były dom kupca Muraŭjova)… u vyšejzhadanym budynku na momant pravierki — 06.09.2011 — było pabita škło, niesabranaje śmiećcie, razłamanyja ščytavyja varoty, što robić mahčymym praniknieńnie ŭ budynak starońnich asobaŭ, a taksama pahražaje biaśpiecy hramadzian u suviazi ź blizkim raźmiaščeńniem prypynačnaha punkta hramadskaha transpartu…»

Toje, što rekanstrukcyja zaciahvajecca, turbuje historykaŭ. Na dumku historyka architektury, krajaznaŭca Ihara Trusava, kali najbližejšym časam nie pačnucca narmalnyja pracy, to budynak budzie kančatkova stračany. Z 1988 hoda jon staić biez aciapleńnia, jaho razrabavali ŭ kancy 80-ch — pačatku 90-ch hadoŭ, raboty pa kansiervacyi nie zavieršanyja.

Pavodle infarmacyi Ihara Trusava, prakuratura zajmajecca stanam budynka jašče z 2000 hoda. Adzin z najlepšych staličnych architektaraŭ-restaŭrataraŭ Vadzim Hlińnik admoviŭsia ad navukovaha kiraŭnictva na abjekcie. Heta adzin ź niešmatlikich vypadkaŭ kali navukovy kiraŭnik admaŭlajecca ad kiraŭnictva prajektam rekanstrukcyi.

— Miarkujučy pa ŭsim, budynak i dalej budzie rujnavacca, — miarkuje Ihar Trusaŭ. — Tamu što pracy, jakija možna vieści i ŭzimku, chutčej za ŭsio nie buduć vieścisia. Napeŭna, u inviestara nie chapaje hrošaj, a rarytetnamu budynku ad hetaha stanie tolki horš.

Dom kupca Muraŭjova znachodzicca ŭ šerahu hałoŭnych inviestycyjnych daŭhabudaŭ horada. Jon raźmieščany na Savieckaj płoščy. Hety trochpaviarchovy asabniak z čyrvonaj cehły z unutranym panadvorkam i karetnym prajezdam byŭ pabudavany ŭ pačatku minułaha stahodździa.

Unutranaje ŭbrańnie pomnika ŭ styli madern ŭražvała: rośpisy, lapnina, kaminy, kaflanyja piečy, poručni z aryhinalnaj raźboj, marmurovyja padvakońniki. Usia hetaja niepaŭtornaja pryhažość zachoŭvałasia da pačatku 90-ch hadoŭ minułaha stahodździa, pakul tam raźmiaščałasia abłasnaja biblijateka. Zatym budynak apuścieŭ. Razrabavany dom z zakałočanymi dźviaryma prastajaŭ da 2006 hoda.

Na jaho znajšoŭsia pakupnik — AAT «Biełaruski narodny strachavy piensijny fond», jaki nabyŭ budynak na aŭkcyjonie ŭ śniežni 2005 hoda. Płany byli hrandyjoznymi. U domie kupca praduhledžanyja hatel i restaran ź vidami na Savieckuju płošču. Na pieršym paviersie płanujuć pakinuć adkrytymi padvalnyja pamiaškańni. Na druhim paviersie budzie choł, vychad na bałkon, hatelnyja numary. Na trecim — dva VIP-numary, na čaćviortym — adzin, z naziralnaj placoŭkaj. Unutrany dvoryk adviaduć pad restaran, jaki budzie prahladacca źvierchu, z voknaŭ, jakija vychodziać na ŭnutrany dvoryk. Pad im — biljardny kłub. Budzie i naviasny zašklony kalidor u asnoŭny budynak. Flihiel taksama adviaduć pad hatel.

Ale budaŭniki doŭha nie śpiašalisia na hety abjekt. Tłumačyli heta tym, što nie hatovy prajekt rekanstrukcyi. A kali dakumientacyja była ŭ paradku, niečakana paŭstała inšaja niezvyčajnaja pryčyna… Ściana da ściany z domam Muraŭjova staić žyły budynak. Kab nad budučym hatelem zrabić dach, treba razabrać susiedski. Ale heta mahčyma tolki ŭ tym vypadku, kali tam nie žyvuć ludzi. Amal usich užo pierasialili u novyja kvatery. Zastałasia tolki adna piensijanierka, što naadrez admoviłasia pakidać svajo žyllo.

Takija situacyi zdarajucca niaredka, ale kampramis zvyčajna znachodzicca. U hetaj historyi čamuści ŭsio inakš. Sprava z babulaj ciahniecca da hetaha času. Miž tym času mała. Ciapier budaŭnikoŭ na abjekcie znoŭ nie vidać.

• 0
• 0
• 0
• 0
• 0
• 0
• 0
• 0