Što pra čałavieka kaža počyrk

Časam pa počyrku pra čałavieka možna daviedacca bolš, čym pry razmovie. Ad asablivaściaŭ charaktaru da najaŭnaści chvarobaŭ serca i lohkich. Naprykład, kali ŭ vašym počyrku ŭ vierchnich pietlach litar sustrakajucca prabieły, heta značyć, što varta źviarnuć uvahu na serca — mahčyma, nie ŭsio ŭ paradku.

Śpiecyjalisty pa počyrku mohuć amal upeŭniena dyjahnastavać nieŭrozy, ałkahalizm, narkamaniju, schilnaść da samahubstva, isteryju i navat suchoty.

Ale, kab daviedacca što­niebudź cikavaje pra čałavieka, jaki dasłaŭ vam list, nie abaviazkova być hrafołaham. Kožny moža skarystacca nastupnymi kryterami.

Nachił

Nachił litar vyražaje staŭleńnie aŭtara da respandenta.

Jaskravy nachił uleva pakazvaje, što aŭtar — intraviert, jaki nie daje voli emocyjam. Ludzi ź levym nachiłam u počyrku časta bajacca budučyni. Lohki nachił uleva, što cikava, nie śviedčyć pra hetyja charaktarystyki.

Kali litary nie nachilajucca ŭvohule — čałaviek moža być vielmi praktyčny, jaki chavaje ad vas usialakija emocyi. Uździejničać na jaho vam budzie ciažka.

Samy pryjemny ŭ adnosinach čałaviek, u jakoha na piśmie litary majuć lohki pravy nachił. Tut prajaŭlajucca i emacyjnaść, i prahmatyzm. Ale ni toje, ni toje nie źjaŭlajecca praźmiernym.

Kali ž litary mocna nachileny ŭprava — pierad vami krajni ekstraviert, jaki stavicca da žyćcia lohka. Dla takich ludziej charakterny impulsiŭnyja rašeńni i ŭ niejkaj stupieni — biazdumnaść.

Nakirunak radka i vodstup

Źviarnicie ŭvahu na toje, jak vyhladaje napisany vami radok. Kali litary iduć uniz — značycca, varta pasprabavać stavicca da žyćcia ź mienšaj zaściarohaj. Taki počyrk charakterny dla piesimistaŭ. Kali ž naadvarot — i vašy radki imknucca kudyści ŭvierch, to vy — aptymist, mienavita takija ludzi čaściej za ŭsio padychodziać da luboj spravy ź vialikim entuzijazmam.

Roŭny počyrk vykryvaje ŭ čałavieku sapraŭdnaha realista, jaki dziejničaje pa abstavinach, ale emocyi jakoha nie iduć praz kraj. A voś kali radki mianiajuć svoj kirunak — tady možna śmieła kazać pra schilnaść da krajnich stanaŭ: kali ŭžo viesieła, dyk niastrymna, a kali depresija — dyk samaja hłybokaja.

Nie mienšaje značeńnie maje vodstup. Staŭleńnie da adrasata dobra prasočvajecca, kali pahladzieć na intervał pamiž vierchnim krajem staronki i tekstam.

Šyroki vodstup — prykmieta vialikaj pavahi da adrasata, žadańnie spadabacca. Vuzki — naadvarot: ci abyjakavaje staŭleńnie, ci adsutnaść pavahi. Ź inšaha boku, vuzki vodstup časam dazvalajuć sabie vielmi blizkija ludzi, jakija na padśviadomym uzroŭni ŭžo daŭno dakazali adzin adnamu svaju pavahu.

Pamier litar i podpis

Bujny počyrk charakterny dla ludziej samaŭpeŭnienych. Taki čałaviek zrobić usio zapłanavanaje «jak treba», pryčym jak treba jamu i ŭ jaho razumieńni. Cisnuć na takoha čałavieka, imknucca jaho ŭpeŭnić u advarotnym — biessensoŭna. A voś skancentravacca takomu čałavieku ciažka, zatoje pakrasavacca — heta kali łaska.

Ludzi z drobnym počyrkam zvyčajna ścipłyja, ale vielmi adkaznyja. Zasiarodzicca na niejkaj adnoj spravie ŭ ich atrymlivajecca šykoŭna. Kali ŭžo taki čałaviek niešta zadumaŭ — jon hetaha dabjecca, choć i zrobić heta cicha z kropki hle­džańnia astatnich.

Šmat pra što možna daviedacca z pryncypu «złučeńnia» litar. Mienavita hety aśpiekt ilustruje intelektualnuju dziejnaść aŭtara. Čałaviek, jaki nie dapuskaje razryvaŭ pamiž litarami, — łohik, i kožnaje jahonaje rašeńnie maje pad saboj łahičny fundamient. Kali razryvy sustrakajucca zredku — heta ŭžo spałučeńnie łohiki i intuicyi. A voś razryvy pamiž usimi litarami — heta prykmieta lehkadumnaści, a taksama tvorčaha składu asoby.

Kali vy zaŭvažyli, što charaktar podpisu vielmi roźnicca ad počyrku, heta kaža pra toje, što čałaviek imkniecca stvaryć vobraz, a ŭ žyćci jon absalutna inšy. Kali nachił litar podpisu nie adpaviadaje nachiłu litar asnoŭnaha tekstu, chutčej za ŭsio taki čałaviek dobra prystasoŭvajecca da abstavinaŭ.

Padkreśleny podpis kaža pra ŭpeŭnienaść u sabie, mahčyma, navat praźmiernuju. Asabliva kali rosčyrk składany i doŭhi. Kali ž rosčyrk štučna ŭpryhožany zavitkami — heta ŭžo prostaje samalubavańnie i žadańnie znachodzicca ŭ centry ŭvahi.

• 0
• 0
• 0
• 0
• 0
• 0
• 0
• 0