«Kursk»: 10 hod z dnia trahiedyi

Aficyjnaja viersija pryčyny trahiedyi — vybuch vučebnaj tarpiedy. Nieaficyjnyja — sutyknieńnie ź inšaj padłodkaj i tarpiednaja ataka.

12 žniŭnia 2000 h. u Barancavym mory ŭ časie vajenna-marskich vučeńniaŭ rasijskaha fłotu zatanuła atamnaja padvodnaja łodka K-141 «Kursk». Trahiedyja zabrała žyćci 118 čałaviek. Aficyjnaja viersija pryčynaŭ hibieli submaryny: vybuch vučebnaj tarpiedy u tarpiednym adsieku. Heta była tarpieda na pierakisie vadarodu. Padobny typ tarpiedaŭ na toj momant užo mała kim vykarystoŭvaŭsia ź mierkavańniaŭ biaśpieki. Nieaficyjnyja viersii, niekatoryja ź jakich paźniej uvasobilisia ŭ scenarach dakumientalnych filmaŭ i pjesaŭ, havaryli pra sutyknieńnie ź inšaj, mahčyma zamiežnaj submarynaj, a taksama pra tarpiednuju ataku na «Kursk». U pryvatnaści viadoma, što za vučeńniami ŭ Barancavym mory sačyli vajenna-marskija siły ZŠA.

Niahledziačy na toje, što Vialikabrytanija i ZŠA prapanavali svaju dapamohu ŭ paniadziełak, 14 žniŭnia, Vajenna-marski fłot Rasii zajaviŭ pra samastojnaje praviadzieńnie vyratavalnaj apieracyi. Na toj momant dakładna było viadoma, što na borcie submaryny zastavalisia acalełyja ŭ katastrofie maraki. Prapanova zamiežnikaŭ była pryniataja tolki ŭ sieradu 16-ha, kali stała zrazumieła, što na padłodcy najchutčej nie zastałosia žyvych ludziej. Narviežskija i brytanskija ratavalniki prystupili da pracy 20 žniŭnia. U vieraśni 2000 h. u intervju Łary Kinhu prezident Rasii Uładzimir Pucin patłumačyŭ zatrymku z pryniaćciem zamiežnaj dapamohi tym, što Rasija nibyta mieła dla vyratavalnaj apieracyi ŭsio nieabchodnaje. A jahony adkaz na pytańnie, što ŭsio ž zdaryłasia z padłodkaj «Kursk», uraziŭ svaim cynizmam uvieś śviet.

Pucin adkazaŭ dvuma słovami: «Jana patanuła».

Chronika padziejaŭ

Subota, 12 žniŭnia

U 23:30 pa miascovym časie padvodnaja łodka K-141 «Kursk» nie vychodzić na sieans suviazi.

Niadziela, 13 žniŭnia

3:21. Echałot krejsiera «Piotr Vialiki» znachodzić miesca zatapleńnia submaryny na hłybini 108 m. Pieršyja sproby vyratavańnia padłodki byli zroblenyja a 10-j ranicy.

Paniadziełak, 14 žniŭnia

11:00 Kamandavańnie Vajenna-marskoha fłotu Rasii. U paniadziełak źjaŭlajucca supiarečlivyja zajavy rasijskaha boku. Paviedamlajecca, što padłodka zatanuła ŭ niadzielu, što na joj niama atamnaj zbroi. Źjaŭlajecca pieršyja viersii pryčynaŭ zdareńnia: sutyknieńnie ź inšaj submarynaj i vybuch na borcie padłodki. Apošniaj viersii prytrymlivajucca rasijskija vajennyja.

Svaju dapamohu ŭ praviadzieńni vyratavalnaj apieracyi prapanujuć Vialikabrytanija i ZŠA.

Aŭtorak, 15 žniŭnia

Niespryjalnyja ŭmovy pieraškadžajuć vyratavalnikam. VMF Rasii admaŭlajecca ad zamiežnaj dapamohi.

Sierada, 16 žniŭnia

Prezident Rasii Uładzimir Pucin nazyvaje situacyju ŭ Barancavym mory krytyčnaj. Hučyć zajava, što prykmietaŭ žyćcia na padłodcy bolš nie adznačajecca. Uviečary Rasija prymaje prapanovu Anhlii i Narviehii ab dapamozie.

Čaćvier, 17 žniŭnia

Niaŭdałyja sproby vyratavalnikaŭ, abumoŭlenyja drennym nadvorjem. Pieramovy rasijskich vajennych u Brusieli z pradstaŭnikami NATO.

Piatnica, 18 žniŭnia

Vyratavalnaja apieracyja praciahvajecca, situacyja charaktaryzujecca, jak zvyškrytyčnaja.

Subota, 19 žniŭnia

Vajennyja zajaŭlajuć, što ekipaž padłodki zahinuŭ. Apieracyja praciahvajecca.

Niadziela, 20 žniŭnia

Da apieracyi dałučylisia narviežskija i brytanskija vadałazy. Robiacca sproby adčynić luk vyratavalnaha šluza.

Paniadziełak, 21 žniŭnia

13:47 pa maskoŭskim časie. Narviežcy zdoleli adčynić luk.

17:07. Aficyjnaja zajava pra hibiel ekipaža atamnaja padvodnaja łodka K-141 «Kursk».

Z 118 členaŭ ekipažu byli znojdzienyja 115 čałaviek.

***

Atamnaja padvodnaja łodka K-141 «Kursk» (pa kłasifikacyi NATO — «Oscar-II»). Spuščanaja na vadu ŭ mai 1994 h., 30 śniežnia taho ž hoda pryniataja ŭ ekspłuatacyju. Ekipaž — 130 čałaviek, aŭtanomnaść płavańnia — 120 dzion, maksimalnaja hłybinia pahružeńnia — 0,5 km. Daŭžynia korpusa — 154 m, šyrynia — 18,2 m. Uzbrajeńnie — supraćkarabielny rakietny kompleks P-700 «Hranit», tarpiedy. U 2001 h. było aficyjna zajaŭlena, što na momant katastrofy na K-141 jadziernaj zbroi nie było.

• 0
• 0
• 0
• 0
• 0
• 0
• 0
• 0