U Homieli elektryk učyniŭ vosiem zamykańniaŭ u čužoj kvatery i spaliŭ techniku
Kamunalniki nie śpiašajucca kampiensavać škodu — i voś čamu.
U redakcyju «Mocnych navin» źviarnułasia žycharka doma №3 pa vulicy Bahdanava. Zvyčajnaja ranica 2 śniežnia pieratvaryłasia dla hamialčanki ŭ miesiac paniki i strachu za ŭłasnaje žyćcio. Vinoj usiamu — vizit elektryka da susiedziaŭ, jaki skončyŭsia kamunalnym fijaska i psavańniem pałovy chatniaj techniki.
Usio pačałosia kala 9 hadzin ranicy. U kvatery dziaŭčyny raptam zhasła śviatło — u hety čas pracavali prałka i pasudamyjka. Vyjšaŭšy na placoŭku, dziaŭčyna ŭbačyła elektryka, jaki korpaŭsia ŭ susiedskim ščytku.
Dalej na kuchni «vybuchnuła» mikrachvaleŭka. Haspadynia znoŭ vybiehła da majstra, ale toj skazaŭ, što sam ničoha nie razumieje.
Niahledziačy na zvanki ŭ słužbu 115 z prośbaj adchilić sumnieŭnaha śpiecyjalista, «raboty» praciahnulisia.
Vynik — jašče 5—6 karotkich zamykańniaŭ zapar, u vyniku jakich pierahareli kavamašyna, ZVČ, paraačyščalnik, roŭter razam z pravadami, razietka na kuchni.
Mikrachvaleŭku paźniej adramantavali, a voś z astatniaj technikaj cišynia, kaža hamialčanka. Jana paprasiła spravazdaču ab rasśledavańni, ale atrymała admovu.
«U infarmacyi ab rasśledavańni incydentu mnie aficyjna admovili. Hrošy za škodu addavać nie chočuć. Elektryk za svoj košt adramantavaŭ tolki mikrachvaleŭku, a pra astatniuju techniku — maŭčańnie», — kaža dziaŭčyna.
Akramia finansavych strat, situacyja ŭdaryła pa niervach. Paśla zamykańniaŭ staraja pravodka ŭ kvatery moža prynieści luby siurpryz.
«Miesiac žyvu ŭ panicy. Mnie prosta strašna sychodzić na pracu — bajusia, što kvatera zaharycca. Nichto nie pravieryŭ, u jakim stanie pravady paśla taho, što zdaryłasia. Heta prosta strašna», — havoryć dziaŭčyna.
Mirycca z usim hamialčanka nie maje namieru. Jana płanuje padać pazoŭ u sud na kampiensacyju maralnaj i materyjalnaj škody. Taksama dumaje pra zajavu ŭ prakuraturu z patrabavańniem pravieryć dziejnaść kiraŭnictva kamunalnaj haspadarki, jakoje dapuskaje da pracy takich śpiecyjalistaŭ.
Što kažuć u ŽEU
«Mocnyja Naviny» źviarnulisia pa kamientar u ŽEU. U pravavym adździele adkazali, što dziejničajuć pavodle zakona i na praciahu dvuch tydniaŭ paśla zdareńnia praviali pasiadžeńnie kamisii ab kampiensacyi škody, paśla čaho nakiravali paciarpiełaj piśmovy adkaz. Tam paviedamili, što pryznajuć vinu elektryka i nie admaŭlajucca ad vypłataŭ.
Dla hetaha hamialčancy treba padać dakumienty z servisnych centraŭ, kudy jana źviartałasia dla ramontu techniki — z ukazańniem vydatkavanych sum.
Mikrachvaleŭku ŭžo adramantavali i z harantyjnym terminam viarnuli zhodna z aktam, «u jakim jana raśpisałasia, što pretenzij nie maje». Čakajuć dakumienty nakont kavamašyny i astatniaha.
«U vypadku, kali jana nie zmoža padać hetyja dakumienty, to pastanova ab dobraachvotnaj kampiensacyi škody našym pradpryjemstvam, viadoma, razhladacca nie budzie», — skazali na pradpryjemstvie.
I dadali, što hamialčanka maje prava źviarnucca ŭ sud, kali nie zhodnaja ŭrehulavać sprečku ŭ dobraachvotnym paradku.
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary
Druhoje: da čaho tut razumny dom, kali tvoj kaleha, mabyć, try fazy pierad ličylnikam skruciŭ u adnu i puściŭ da susiedki?
A ciapier suriozna. Daju saviet usim, prysłuchajciesia, mnie jašče dziakuj skažycie. Kupicie niedarahoje "riele napriažienija", cieraź jakoje usie darahija prybory padklučajucca u elektryčnuju sietku. Heta 100% harantyja ad usich kataklizmau. Ja sabie takija pastaviu paśla taho, jak u anałahičnaj situacyi "zhareła" pralnaja mašyna.