Supracoŭniki Fondu baraćby z karupcyjaj (FBK), jaki ŭ svoj čas zasnavaŭ Alaksiej Navalny, vyśvietlili, što ŭ prezidenta Rasii Uładzimira Pucina źjaviŭsia novy pałac na mysie Aja ŭ Krymie.
Spačatku hety kompleks budavali jak daču byłoha prezidenta Ŭkrainy Viktara Janukoviča, ale paśla anieksii Kryma budaŭnictva pryznali niezakonnym. Abjekt pieradali blizkim da Pucina biznesmienam Juryju i Barysu Kavalčukam, paśla čaho pierabudavali ŭ adpaviednaści z patrabavańniami Fiederalnaj słužby achovy Rasii. Na ŭsio heta patracili nie mienš za 10 miljardaŭ rasijskich rubloŭ (kala 127,4 miljona dalaraŭ).
Pa słovach FBK, ciapier pałac amal nie padobny na daču Janukoviča — u paraŭnańni ź im jana vyhladała jak «chałupa». U hałoŭnym budynku jość zał na 233 kvadratnych mietraŭ sa stałom na 20 čałaviek, spalnia płoščaj 154 kvadratnyja mietry z marmurovaj vannaj i džakuzi, jašče adna spalnia na 183 kvadratnyja mietry.
Na nižnim paviersie znachodzicca asabistaja balnica ź niekalkimi kabinietami: tam jość kabiniet terapieŭta z ultrahukavym aparatam, stoł dla ahladu i masažu, abstalavańnie dla analizaŭ, elektrakardyjohraf i prybor dla fizijaterapii. Taksama jość kabiniet stamatołaha i apieracyjnaja z sučasnym abstalavańniem, spa-centr z basiejnam, kryjakamiera, kinazała, biljardnaja i vinny pohrab.
Pobač z hałoŭnym budynkam raźmieščanyja hatelnyja apartamienty, na dachu jakich — park ź vidam na mora, a na terytoryi kala 3,5 hiektara — viertalotnaja placoŭka.
FBK piša, što finansavali budaŭnictva biznesmien Uładzimir Kołbin (syn siabra dziacinstva Pucina), firma «Aratron» i kampanija «Forstys», jakaja, mahčyma, źviazanaja ź Juryjem Kavalčukom. Raniej «Novaja hazieta» taksama paviedamlała, što dača na mysie Aja naležyć siabram Pucina i nazyvała jaje «dačaj Kavalčuka».
Kamientary