U paniadziełak prezident Litvy Hitanas Naŭsieda sustreŭsia z łaŭreatam Nobieleŭskaj premii miru 2022 hoda Alesiem Bialackim, jaki ŭ subotu vyjšaŭ na volu. Udzieł u sustrečy brała i Śviatłana Cichanoŭskaja.
«My ź vialikaj palohkaj uspryniali viestku pra toje, što paśla mnohich hadoŭ niespraviadlivaha źniavoleńnia vy narešcie na voli. Vaša stojkaść, maralnaja siła i niepachisnaja addanaść čałaviečaj hodnaści — navat u samy ciažki čas — natchniajuć nas usich», — skazaŭ prezident Litvy.
Hitanas Naŭsieda adznačyŭ, što Litva zaŭsiody padtrymlivała i budzie praciahvać padtrymlivać namahańni Złučanych Štataŭ Amieryki pa vyzvaleńni ŭsich biełaruskich palityčnych źniavolenych.
«Razam my paśladoŭna padkreślivajem, što biełaruski režym pavinien pakłaści kaniec usim palityčnym represijam i nie pačynać novych, što ŭ Biełarusi pavinny adbycca demakratyčnyja, svabodnyja i spraviadlivyja vybary i što lubaja padtrymka režymam Łukašenki ahresiŭnaj vajny Rasii suprać Ukrainy pavinna być spynienaja», — skazaŭ prezident Litvy.
Daradca Cichanoŭskaj Dzianis Kučynski raskazaŭ «Našaj Nivie», što na sustrečy ŭdzielniki razmaŭlali i pra nieabchodnaść cisku na režym Łukašenki.
«I Cichanoŭskaja, i Naŭsieda, i Bialacki sychodziacca ŭ tym, što nadzvyčaj važna nie asłablać mižnarodny cisk na režym Łukašenki».
«Taksama Aleś Bialacki raskazaŭ prezidentu Naŭsiedzie, što, navat znachodziačysia ŭ turmie, moh nazirać, jak režym sprabuje dyskredytavać Litvu. U pryvatnaści z naŭmysnymi sprobami vystavić našaha susieda ŭ kiepskim śviatle praz chłuśniu i pravakacyi — u tym liku ŭ kantekście hibrydnych atak ad režymu: z šarami i faktyčnym ŭziaćciem hruzavikoŭ u zakładniki», — padzialiŭsia Kučynski.
Cichanoŭskaja asobna padziakavała prezidentu Litvy za salidarnaść i pryncypovaść Litvy i litoŭskaha naroda. Taksama jana padziakavała prezidentu ZŠA Donaldu Trampu i śpiecpradstaŭniku ZŠA pa Biełarusi Džonu Koŭłu za humanitarnyja vysiłki, jakija dapamahli vyzvalić Alesia Bialackaha i vyratavać žyćci ludziej.
Ciapier čytajuć
Dźmitryj Siemčanka: Ja pryjšoŭ u puł Łukašenki bicca z Rasijaj20
Kamientary