Dziasiatki krain achapiła novaja chvala hrypu, pryjšoŭ novy niebiaśpiečny štam

Dziasiatki krain na ŭsich kantynientach nakryła novaja chvala hrypu, i ŭ hetym siezonie vinavatym u vialikaj častcy vypadkaŭ staŭ novy, asabliva niebiaśpiečny štam virusa, piša Bi-bi-si.

Spačatku subkład (padhalina) K štama H3N2 byŭ znojdzieny ŭ Aŭstralii i Novaj Ziełandyi, potym byli ŭspyški ŭ Japonii i Brytanii, a ciapier hety varyjant virusa zafiksavany ŭžo bolš čym u 30 krainach va ŭsich častkach śvietu.

Raniej hety varyjant sustrakaŭsia redka, i tamu ŭ ludziej niedastatkova imunitetu da jaho. U Brytanii ŭ balnicy kožny tydzień traplajuć užo tysiačy zachvarełych.

Što ŭjaŭlaje saboj mutacyja virusa hrypu H3N2

Virusy hrypu mutujuć pastajanna, i miedyki adsočvajuć hetyja źmieny, kab stvarać novyja dziejsnyja vakcyny suprać ich.

U bolšaści vypadkaŭ mutacyi nievialikija, ale časam zdarajecca, što virus źmianiajecca rezka i vielmi istotna.

Jak tłumačyć dyrektar Centra evalucyi patahienaŭ pry Kiembrydžskim univiersitecie Derek Śmit, H3N2 źviedaŭ siem mutacyj.

«Jon amal napeŭna prakacicca pa ŭsim śviecie», — pradkazvaje prafiesar Śmit.

Ci bolš niebiaśpiečny hety štam, čym inšyja

Z subkładam K H3N2 ludzi ŭ apošnija hady sutykalisia redka, i, adpaviedna, u ich nie vypracavaŭsia ŭstojlivy imunitet da jaho.

Tamu, choć simptomy pry novym vyhladzie hrypu, mahčyma, i nie ciažejšyja za zvyčajnyja, ale zarazicca im moža bolšaja kolkaść ludziej.

Varta pamiatać, što niekatoryja z tych, chto padchapiŭ virus, pieranosiać jaho naohuł bieź simptomaŭ, ale ŭ mnohich inšych pačynajucca žar, boli ŭ roznych častkach cieła i chutkaja stamlalnaść, a dla pažyłych i asłablenych inšymi chvarobami hety virus moža naohuł akazacca śmiarotnym.

«Takoha virusa my daŭno nie bačyli. Niezvyčajnaja dynamika, — kaža dyrektar Suśvietnaha centra hrypu pry brytanskim Instytucie Frensisa Kryka Nikoła Ljuis. — Ja chvalujusia, kaniečnie. Nie panikuju, ale zaniepakojena».

Jak adroźnić hryp ad prastudy i kavidu

Mnohija simptomy pry prastudzie, hrypie i kavidzie supadajuć, ale jość i adroźnieńni, pa jakich možna vyznačyć, čym vy zachvareli.

Prastuda zvyčajna nadychodzić pastupova i prajaŭlajecca ŭ nasmarku i boli ŭ horle.

Hryp zvyčajna pačynajecca raptoŭna i niasie z saboj tempieraturu, boli ŭ roznych miescach i asłablenaść ciahlicaŭ.

Pry kavidzie simptomy padobnyja da simptomaŭ hrypu, ale adnoj z hałoŭnych admietnych prykmiet moža być strata smaku i niuchu. Akramia taho, kavid moža supravadžacca vielmi rezkim bolem u horle i dyjarejaj.

Jak abaranicca ad hrypu

Najlepšy sposab praduchilić zachvorvańnie na hryp — pryščepka. Choć najaŭnyja ciapier vakcyny, mahčyma, niedastatkova efiektyŭnyja suprać novaha varyjanta virusa.

«Choć niejkaja abarona lepšaja, čym jaje poŭnaja adsutnaść, ale ŭ hetym hodzie, padobna, abarona budzie mienšaja, čym u tyja hady, kali vakcyny lepš adpaviadajuć virusu. Situacyja dalokaja ad ideału», — skazaŭ Bi-bi-si prafiesar Krystof Frejzier ź Instytuta pandemij pry Oksfardskim univiersitecie.

«Virusy subkłada K, jakija ciapier cyrkulujuć, u častcy antyhienaŭ [markieraŭ, jakija raspaznaje imunnaja sistema — Bi-bi-si] trochi adroźnivajucca ad papiarednich štamaŭ, tak što kali vy nie zrabili novuju pryščepku ŭ hetym hodzie, vy z bolšaj vierahodnaściu i ciažej zachvarejecie na hryp», — tłumačyć Nikoła Ljuis.

Hałoŭnaje, što moža dać najaŭnaja ciapier vakcyna, jak tłumačać śpiecyjalisty, heta toje, što jana źmiakčyć simptomy i dapamoža strymać raspaŭsiud virusa.

Strymać raspaŭsiud dapamahajuć i roznyja vidy karancinaŭ. U Japonii i Anhlii, naprykład, užo zakrytaja častka škoł.

Nu i akramia taho, na asabistym uzroŭni zmahacca z epidemijaj dapamahajuć staryja, dobra viadomyja pryjomy: kali zachvareli, zakryvajcie rot i nos chustkaj, kali kašlajecie ci čchajecie, i pa mahčymaści nie vychodźcie z domu.

Napłyŭ pacyjentaŭ u balnicach Brytanii

U Anhlii, dzie žyvuć amal 59 z prykładna 70 miljonaŭ žycharoŭ Złučanaha Karaleŭstva, u pieršy tydzień śniežnia ŭ balnicy z hrypam źviartalisia ŭ siarednim 2660 čałaviek u dzień.

Jak paviedamlaje anhlijskaje padraździaleńnie Nacyjanalnaj słužby achovy zdaroŭja, NHS England, heta ŭ paŭtara raza bolš, čym u apošni tydzień listapada, a paśla 7 śniežnia kolkaść zachvarełych praciahvaje raści, i da piku jašče vielmi daloka.

Da 14 śniežnia kolkaść zvarotaŭ pa prahnozach miedykaŭ dasiahnie 5‑8 tysiač u dzień. Pakul rekord u Anhlii pry siezonnym hrypie — 5400 čałaviek u dzień.

Kolkaść zachvarełych tak ža chutka raście i ŭ inšych častkach Złučanaha Karaleŭstva: u Šatłandyi, Uelsie i Paŭnočnaj Irłandyi.

U mnohich balnicach i škołach Brytanii ŭviali abaviazkovaje našeńnie masak.

A što ŭ Biełarusi?

Situacyju z hrypam prakamientavaŭ Minsk-navinam hałoŭny doktar Minska Juryj Horbič.

«Sioleta ŭ nas siezonny hryp, zvyčajna pik zachvorvańnia prypadaje na kaniec śniežnia, studzień i pačatak lutaha. Pandemičny hryp 2009 hoda ŭvachodzić u skład tych virusaŭ, jakija ŭ nas cyrkulujuć, ale novaha pandemičnaha štama nie budzie», — skazaŭ jon.

• 2
• 0
• 0
• 1
• 4
• 3
• 0
• 0