Situacyja adbyłasia ŭ Mazyry. U pačatku krasavika 30‑hadovaja žančyna źviarnułasia da śpiecyjalistki, kab źniać naroščanyja vałasy, a zatym vykanać bijabiałkovaje naroščvańnie novych. Pasłuha abyšłasia ŭ 210 rubloŭ. Ček pa fakcie apłaty majstar nie vydała, piša «Homielskaja praŭda».
Paśla pracedury ŭ žančyny pačała baleć hałava. Da taho ž adčuvaŭsia vyrazny dyskamfort ad «paciahvańnia vałasoŭ». Pra heta jana adrazu paviedamiła majstrysie. Taja rastłumačyła prablemu: maŭlaŭ, pastaviła šmat kapsuł, ciapier treba prosta paciarpieć niekalki dzion.
Adnak čas išoŭ, a bol nie prachodziŭ. Pry hetym hałava pačała mocna śviarbieć, i vałasy pačali vypadać cełymi kłokami.
Žančynie daviałosia čarhovy raz źviarnucca da śpiecyjalistki pa paradu, što rabić dalej. Majstarka abmalavała situacyju tak: vałasy vypadajuć sami pa sabie, pryčyna kryjecca ŭ arhaniźmie klijentki, tamu joj varta prapić kurs žaleza abo jakich-niebudź vitaminaŭ, raskazała pres-sakratarka Homielskaha abłasnoha suda Alina Sulejka.
Adnak śvierb skury ŭ mazyranki nie spyniaŭsia. Tady jana źviarnułasia da inšaha śpiecyjalista, užo ŭ aficyjnym sałonie. Novaja majstarka paraiła terminova zdymać vałasy, bo jany byli naroščany niajakasna. I jakraz z-za hetaha ŭ žančyny baleła i śviarbieła hałava.
Amal u samym kancy krasavika paciarpiełaja žančyna trapiła da pieršaj śpiecyjalistki dla źniaćcia naroščanych vałasoŭ. Paśla pracedury jana zapatrabavała ŭ majstarki viartańnia raniej zapłačanych hrošaj, bo vidavočna, što pasłuha była akazana niajakasna. Taja zhadziłasia, ale viarnuła tolki 140 rubloŭ, zajaviŭšy, što astatnija patraciła na materyjał dla vykanańnia naroščvańnia.
Łahična, što žančynu takaja aryfmietyka nie zadavoliła. Jana źviarnułasia ŭ sud, paprasiŭšy ŭ pazoŭnaj zajavie spahnać z adkazčycy kampiensacyju maralnaj škody, a taksama tyja samyja 70 rubloŭ.
Pavodle Zakona «Ab abaronie pravoŭ spažyŭcoŭ» klijent moža skasavać dahavor ab akazańni pasłuhi i patrabavać viartańnia zapłačanaj za jaje sumy, kali niedachopy nie ŭchileny vykanaŭcam, udakładniła Alina Sulejka.
Akramia taho, u adpaviednaści z zakanadaŭstvam spažyviec maje prava na toje, kab akazanaja pasłuha była biaśpiečnaj dla žyćcia i zdaroŭja. U suviazi z tym, što ŭ dadzienym vypadku adkazčyca hetyja kryteryi nie vykanała, sud Mazyrskaha rajona zadavoliŭ patrabavańni istcy ŭ poŭnym abjomie, pastanaviŭšy spahnać na jaje karyść astatak zapłačanaj sumy — 70 rubloŭ i hrašovuju kampiensacyju maralnaj škody — 200 rubloŭ. U dachod dziaržavy adkazčyca abaviazana vypłacić dziaržpošlinu ŭ pamiery 210 rubloŭ.
Ciapier čytajuć
Łukašenka pakazaŭsia ŭ Amanie tolki na čaćviorty dzień vizitu — doma ŭ sułtana. Ź im Viktar i Kola12
Kamientary