Z 21 pa 24 listapada Varšaŭskaj prahramaj fiestyval intelektualnaj knihi PRADMOVA praciahnie svoj siomy siezon. Na čatyroch haradskich placoŭkach adbuducca prezientacyi knih, sustrečy ź biełaruskimi i zamiežnymi aŭtarami, litaraturnyja, histaryčnyja i kinadyskusii, muzyčnyja i teatralnyja imprezy, jakija dazvolać pabačyć sučasnuju Biełaruś i biełarusaŭ z roznych bakoŭ, paviedamlaje bellit.info.
Fiestyval raspačniecca ŭ piatnicu 21 listapada dyskusijaj, prymierkavanaj da 95‑hodździa Uładzimira Karatkieviča, «Naša ziamla, nielubimaja nami i strašnaja»: Uładzimir Karatkievič i (piera)stvareńnie biełaruskaha nacyjanalnaha mifa». Udzielniki i ŭdzielnicy dyskusii pasprabujuć parazvažajuć pra rolu piśmieńnika ŭ stvareńni alternatyŭnaha varyjanta nacyjanalnaha mifa, pra fienomien papularnaści prapanavaj Karatkievičam stratehii i jaje vodhulle ŭ XXI stahodździ.
Zavieršycca pieršy fiestyvalny dzień muzyčna-litaraturnym prajektam LITARANOTY — sustrečaj sučasnych paetaŭ i paetak z muzykami-impravizatarami, dzie na vačach u publiki narodzicca sumoŭje i suhučča.
U subotu 22 listapada padziei fiestyvalu buduć razhortvacca na čatyroch placoŭkach.
Druhi dzień raspačniecca imprezami, pryśviečanymi biełaruskaj narodnaj kultury, — prezientacyjami knih Volhi Baryšnikavaj «I daŭniej tak pieli. Muzyčny falkłor staravieraŭ paŭnočna-zachodniaj Biełarusi», Volhi Łabačeŭskaj «Abroki. Abydziońniki: žanočyja rytualnyja praktyki» i zbornika «Biełaruskija kałychanki», układzienaha Sieržukom Doŭhušavym.
Haściej fiestyvalu čakaje ceły šerah histaryčnych sustreč: prezientacyja knih Viktara Jakubava i Alaksandra Smalenčuka, dyskusija pra zaradžeńnie nacyj va Uschodniaj Jeŭropie, prablemy stvareńnia sučasnaha histaryčnaha non-fiction i razmova pra toje, čym jość dla nas siońnia Jeŭropa.
Siarod značnych litaraturnych padziej druhoha dnia fiestyvalu — razmova ź piśmieńnicaj i pierakładčycaj Volhaj Hapiejevaj i prezientacyja dziciačaj antałohii «Na puchnatych łapkach», sustreča ź viadomaj finskaj piśmieńnicaj i aktyvistkaj Sofi Oksanien, dyskusija pra pierśpiektyvy biełaruskaha knihavydańnia, prezientacyi biełaruskaha pierakładu ramana Ščepana Tvardacha»Nul» i aŭtabijahrafičnaha ramana «Jabłyk u valizcy» Uładzisłava Navažyłava, a taksama aŭtarskaja sustreča z Sašam Filipienkam i cyrymonija ŭručeńnia Premii imia Karłasa Šermana za najlepšyja pierakłady 2023 i 2024 hadoŭ.
U nasyčanaj padziami prahramie treciaha dnia fiestyvalu zapłanavanyja miž inšaha dyskusii, pryśviečanyja Borchiesu i biełaruskaj tradycyi, navukovaj fantastycy i prablemie razumieńnia samoha paniaćcia «biełaruskaja kniha», razmova Paŭła Ancipava i Cimura Kudzieliča pra roznyja pakaleńni biełaruskaj prozy, lekcyja Mikity Sieńnikava pra komiksy, prezientacyi «Dziuny»Frenka Hierbierta z udziełam pierakładčyka Ihara Kulikova, vialikaj vilenskaj sahi «Silva rerum»Kryściny Sabalaŭskajcie z udziełam Siarhieja Šupy i razmova pra moładzievuju supołku «Majstroŭnia» ź jaje kolišnimi ŭdzielnikami.
Skončycca treci dzień fiestyvalu paetyčnaj kantataj u kaściole Śviatoha Alaksandra, dzie paety i kampazitary našaha času sustrenucca ŭ huku i słovie. Vieršy, jakija prahučać u vykanańni samich aŭtaraŭ, nabuduć novaje žyćcio ŭ muzycy, stvoranaj kampazitarami.
Paetyčnaja Kantata — heta tvor ź dzieviaci častak, napisany dla čytalnikaŭ i čytalnic, dziciačaha choru i arhana. U im možna pačuć žyvoje dychańnie paezii i toje, jak jaje pačuli kampazitary.
Čaćvierty fiestyvalny dzień prapanuje haściam śpiektakl «Valizka» pavodle Małhažany Sikorskaj-Miščuk ad «Volnych Kupałaŭcaŭ» na scenie Dramatyčnaha teatra.
Raniej užo fiestyval pravodziŭsia ŭ hetym hodzie ŭ Vilni, Prazie i Poznani.
Kamientary