Kadebešniki i kašalok Łukašenki — stała viadoma, chto kiruje novym kansiervavym zavodam u Novałukomli, «anałahaŭ jakomu niama»
Na rybnym rynku źjaviŭsia novy hulec: biznesoviec Alaksandr Zajcaŭ adkryŭ kansiervavy zavod u Novałukomli, u kiraŭnictvie — byłyja supracoŭniki KDB.
Biznesoviec Alaksandr Zajcaŭ, jakoha nazyvajuć «kašalkom» Alaksandra Łukašenki, zapuściŭ ułasnaje pradpryjemstva pa pierapracoŭcy rybnaj pradukcyi — Łukomlski kansiervavy zavod. Pra heta stała viadoma vydańniu «Biuro».
Zavod byŭ aficyjna adkryty 4 kastryčnika ŭ Novałukomli (Čašnicki rajon). Pradpryjemstva aryjentavana na pierapracoŭku presnavodnaj i marskoj ryby, a taksama morapraduktaŭ. «Anałahaŭ pradukcyi Łukomlskaha kansiervavaha zavoda na prastorach Biełarusi niama», — kažuć na pradpryjemstvie.
Ułaśniki i kiraŭnictva
Značnaja častka doli ŭ novaj firmie aformlena na 21‑hadovaha syna biznesoŭca — Ramana Zajcava (89%).
Jašče 10% naležać Vasilu Dziemiancieju — byłomu namieśniku staršyni KDB i Dziaržaŭnaha mytnaha kamiteta. Paśla zaviaršeńnia karjery ŭ siłavych viedamstvach Dziemianciej uznačalvaŭ firmu «Bremina hrup», jakoj vałodajuć sam Zajcaŭ-starejšy i jahonyja biznes-partniory: Alaksiej Aleksin i Mikałaj Varabiej.
Dyrektaram zavoda staŭ Anatol Karościn. Karościn pracavaŭ načalnikam Lepielskaha mižrajonnaha adździeła ŭpraŭleńnia KDB pa Viciebskaj vobłaści. Cikava, što mienavita tam u 80‑ch pačynaŭ karjeru i Vasil Dziemianciej.
Jakaja dziaržpadtrymka
Budaŭnictva zavoda prachodziła ŭ miežach dziaržaŭnaj prahramy «Adzin rajon — adzin prajekt», inicyjavanaj Łukašenkam.
Abjom inviestycyj skłaŭ bolš jak 18 miljonaŭ biełaruskich rubloŭ, ź jakich 13,5 miljona — kredyt «Biełahraprambanka».
Akramia srodkaŭ, zavod atrymaŭ učastak ziamli ŭ 2,8 hiektara, a taksama jamu pieradadziena ŭ arendu voziera Łukomlskaje i vydadziena kvota na vyłaŭ 50 ton presnavodnaj ryby.
Marskuju rybu budzie pastaŭlać rasijski partnior — kamčackaja firma «Karakmorapradukt».
Akramia vypusku kansiervaŭ, zavod uziaŭ na siabie abaviazki zaryblać voziera i stvarać umovy dla adpačynku, što dazvalaje jamu dadatkova zarablać na płatnaj rybałcy pad brendam «Łukamorje».
Kamientary