Kiraŭnica Euroclear: Kali ES vyrašyć kanfiskavać rasijskija aktyvy, my źvierniemsia ŭ sud
Kiraŭnica bielhijskaha depazitaryja Euroclear Valery Urben zajaviła, što ŭ vypadku pryniaćcia Jeŭrasajuzam rašeńnia ab kanfiskacyi zamarožanych rasijskich aktyvaŭ jana nie vyklučaje padačy sudovaha isku suprać jeŭrapiejskich instancyj. Urben padkreśliła, što kanfiskacyja supiarečyła b mižnarodnamu pravu ab suvierenitecie aktyvaŭ, jakija naležać dziaržavie. Sama Urben i jaje siamja praz pahrozy ciapier žyvuć pad achovaj.
U intervju vydańniu Le Monde Valery Urben adznačyła, što dla Euroclear, jaki źjaŭlajecca klučavym źvianom finansavaj sistemy z aktyvami na 42,5 tryljona jeŭra, važniejšaje za ŭsio aŭtarytet i davier.
«Isnujuć zakony. U zaležnaści ad pravavoj bazy my vyrašym, što my možam i chočam zrabić», — zajaviła Urben, dadaŭšy, što sud «nie vyklučany».
Valery Urben, čyj depazitaryj zachoŭvaje kala 193 miljardaŭ jeŭra rasijskaha Centrabanka, pryznałasia, što ni niamiecki kancler Frydrych Mierc, jaki prapanavaŭ vykarystać aktyvy ŭ jakaści zakładu, ni prezident Francyi Emanuel Makron ź joj nie kansultavalisia.
Pra płan Mierca jana daviedałasia tolki sa staronki haziety Financial Times.
Niahledziačy na toje, što Urben nie była prainfarmavanaja, tym nie mienš mienavita jana vałodaje klučami da hetych aktyvaŭ. Jana ŭznačalvaje Euroclear, małaviadomuju, ale važnuju ŭstanovu ŭ finansavaj sistemie. Heta miesca, dzie centralnyja banki i inšyja bujnyja mižnarodnyja inviestycyjnyja fondy zachoŭvajuć svaje kaštoŭnyja papiery (akcyi, ablihacyi, finansavyja pradukty i h.d.).
Euroclear kiruje depazitami na sumu 42,5 tryljona jeŭra, što ŭ čatyrnaccać razoŭ pieravyšaje vałavy ŭnutrany pradukt Francyi.
61‑hadovaja Urben nikoli nie płanavała apynucca ŭ centry hłabalnych palityčnych i finansavych padziej. Jana prapracavała ŭ Euroclear bolš za try dziesiacihodździ, padniałasia pa karjernaj leśvicy i ŭ mai 2024 hoda stała hienieralnym dyrektaram kampanii.
Paŭsiadzionnaje žyćcio jaje, piša vydańnie, pieraviarnułasia z noh na hałavu. Choć jana nie moža padrabiazna raskazać pra pahrozy, jakija joj pastupali, ciełaachoŭnik pastajanna supravadžaje jaje ŭžo hod.
Jaje siamja žyvie pad nahladam. Achova ŭ štab-kvatery ŭzmocnienaja. Zvonku nivodnaja šylda nie pakazvaje nazvy ŭstanovy. Unutry kožny hość pieramiaščajecca z propuskam i piersanalizavanym kodam, jaki treba pradjavić na turnikietach na kožnym paviersie. Narešcie, uvachod u kabiniet dyrektara ažyćciaŭlajecca praz dvoje šklanych dźviarej, jakija achoŭvajuć vietlivyja, ale pilnyja ludzi ŭ čornym.
Niahledziačy na źniešni cisk, spadarynia Urben staranna paźbiahaje abmierkavańnia palityki. Jana prosta paŭtaraje, što «lepšy sposab vyrašyć hetaje pytańnie — mirny šlach».
Urben patłumačyła, što «najhoršy varyjant» — heta kali hrašovy aktyŭ budzie nakiravany na finansavańnie pazyki Ukrainie, a Euroclear zastaniecca ź jurydyčnym abaviazacielstvam viartańnia.
«Kali sankcyi zdymuć, Rasija ŭ luby momant moža pastukacca ŭ našyja dźviery i zapatrabavać viartańnia. Chto tady viernie nam 140 miljardaŭ jeŭra, kab pieraličyć ich joj?» — spytała jana.
Hety scenaryj vielmi realny, bo padaŭžeńnie sankcyj adbyvajecca kožnyja paŭhoda i zaležyć ad hałasavańnia ŭsich krain-členaŭ ES, u tym liku tych, chto vystupaje suprać, takich jak Vienhryja i Słavakija.
Akramia jurydyčnaj ryzyki, Urben papiaredžvaje, što kanfiskacyja moža padarvać davier i pryvieści da skaračeńnia inviestycyj u jeŭrazonu z boku hłabalnych inviestaraŭ, u tym liku kitajskich i arabskich.
Kančatkovaje rašeńnie Jeŭrapiejskaha savieta pa vykarystańni rasijskich aktyvaŭ adkładziena da śniežnia.
Euroclear — nie adzinaja ŭstanova, jakaja zachoŭvaje zamarožanyja srodki Centralnaha banka Rasii. Ich zachoŭvajuć u Japonii, Vialikabrytanii, Šviejcaryi i navat Złučanych Štatach. Ahułam tam zachoŭvajecca amal 300 miljardaŭ dołaraŭ (258 miljardaŭ jeŭra).
Tym nie mienš, inšyja zachavalniki pa ŭsim śviecie trymajuć maŭčańnie. A japoncy adkryta vyklučyli lubuju kanfiskacyju. «Hetyja krainy zachoŭvajuć maŭčańnie, — padkreślivaje Urben. — Nam treba pierastać pieraśledvać Euroclear i Bielhiju».
Kamientary