«Dačka padumała, što heta aŭčarka». Što viadoma pra miadźviedziania, jakoje šastała ranicaj pa Viciebsku
Siońnia ranicaj haradskija pabliki Viciebska apublikavali videa, na jakich źniata miadźviedziania, jakoje biehała prosta pa vulicach horada. Mnohija zasumniavalisia, što heta praŭda, ale ŭ MNS paćvierdzili, što ad miascovych žycharoŭ pastupała takoje paviedamleńnie, piša Onliner.by.
Ranicaj čaćviarha ŭ rajonie vulicy Praŭdy ŭ Viciebsku ludzi zaŭvažyli miadźviedziania i paśpieli źniać hety momant. Źvier lohka pierabiahaje prajeznuju častku prama pa piešachodnym pierachodzie, pobač spakojna iduć ludzi. «Jak byccam pobač zajac prabieh, a nie miadźviedź», — pišuć u kamientarach miascovaha pablika.
Zapis možna było pastavić pad sumnieŭ. Pakolki ŭ kamientarach chtości napisaŭ, što miadźviedziania sprabujuć złavić nibyta supracoŭniki MNS, my źviarnulisia ŭ viedamstva za kamientarom.
— Ranicaj sapraŭdy pastupała paviedamleńnie ab tym, što pa horadzie biehaje miadźviedziania. Ratavalniki vyjazdžali na miesca, ale, pakolki tam užo nikoha nie było, jany viarnulisia nazad, — raskazali ŭ viedamstvie.
Ratavalniki nie zajmajucca adłovam miadźviedziaŭ.
Žurnalistam udałosia pahavaryć z mamaj dziaŭčyny, jakaja źniała videa ź miadźviedzianiom.
— Kala vaśmi ranicy maja dačka adviała dzicia ŭ sadok i viartajučysia dadomu, sustreła miadźviedziania, jakoje prabiehła ledź nie kala jaje noh. Spačatku jano kidałasia ŭ dvary našaha doma pa vulicy Praŭdy, 58, potym pabiehła da płota voinskaj častki. Miadźviedziania było nievialikaje, rostam z aŭčarku. Dačka spačatku i padumała, što heta sabaka, i tolki kali jon padbieh da jaje amal uščylnuju, zrazumieła, što heta zusim nie tak, — raskazała viciablanka Iryna.
— Za paŭtara kiłamietry ad nas raźmieščany zaapark, i my dumajem, što źvier, mahčyma, źbieh adtul. Paśla da nas pryjazdžała mašyna MNS, my pakazvali napramak, u jakim uciok miadźviedziania, ale čym usio skončyłasia, nie viedajem.
-
Viaskoviec z-pad Iŭja paprasiŭ pjanaha siabra-biaspraŭnika sieści za rul. Toj razahnaŭsia da 202 km/h — i zabiŭ haspadara aŭto ab słup
-
Praviała noč u lesie. U Kleckim rajonie znajšli 95‑hadovuju žančynu, jakaja źnikła napiaredadni
-
Mužčyna sprabavaŭ uskočyć na ciahnik, ale sarvaŭsia ź jaho i pabiŭsia
Kamientary