Pakistan nanios avijaŭdary pa vajskovych abjektach talibaŭ u Kabule
Ministr abarony Pakistana: «Naša ciarpieńnie łopnuła, Afhanistan staŭ kałonijaj Indyi».
Pakistan nanios avijaŭdary pa vajskovych abjektach talibaŭ u Kabule, a taksama ŭ pravincyjach Kandahar i Paktyja, paviedamiŭ pakistanski telekanał PTV sa spasyłkaj na danyja ŭładaŭ.
Jon pieradaje, što ŭ vyniku ataki zahinuli 72 afhanskija vajskoŭcy, jašče 120 atrymali ranieńni.
Afhanistan zajaŭlaje pra hibiel 55 pakistanskich sałdat u vyniku apieracyi na miažy ŭ čaćvier uviečary. Miascovy telekanał TOLOnews paviedamlaje pra ranieńnie jašče 11 vajskoŭcaŭ i zachop 19 błokpastoŭ.
Ministr abarony Pakistana Chavadža Asif zajaviŭ, što paśla vyvadu vojskaŭ NATA čakałasia, što ŭ Afhanistanie ŭstanovicca mir i što taliby zasiarodziać svaju ŭvahu na intaresach afhanskaha naroda i rehijanalnaj stabilnaści.
«Adnak taliby pieratvaryli Afhanistan u kałoniju Indyi. Jany sabrali terarystaŭ z usiaho śvietu ŭ Afhanistanie i pačali ekspartavać teraryzm. Jany pazbavili ŭłasny narod asnoŭnych pravoŭ čałavieka. Jany adabrali ŭ žančyn pravy, jakija im daje isłam», — zajaviŭ jon.
Jon skazaŭ, što Pakistan prykładaŭ usie namahańni — jak niepasredna, tak i praz družalubnyja krainy — dla padtrymańnia stabilnaści situacyi, adnak taliby stali maryjanietkami Indyi.
«U minułym rola Pakistana była stanoŭčaj. Jon prymaŭ u siabie piać miljonaŭ afhancaŭ na praciahu 50 hadoŭ. Navat siońnia sotni tysiač afhancaŭ zarablajuć sabie na žyćcio na našaj ziamli. Naša ciarpieńnie dasiahnuła miažy. Ciapier heta adkrytaja kanfrantacyja. Ciapier buduć pryniaty rašučyja miery. Vojska Pakistana nie prybyła z-za akijana — my vašy susiedzi i dobra viedajem vašu realnaść», — zajaviŭ Asif.
Učora Afhanistan pačaŭ vajskovuju apieracyju suprać Pakistana. Byli atakavanyja pakistanskija błokpasty, i nibyta ŭžo ŭziatyja pad kantrol 15 pazicyj biez strat z afhanskaha boku
U Kabule śćviardžajuć, što heta adkaz na avijaŭdary, jakija Pakistan nanios unočy ŭ niadzielu pa afhanskich pravincyjach Nanharchar i Paktyka. Isłamabad tłumačyŭ avijaŭdary adkazam na sieryju teraktaŭ u Pakistanie, učynienych śmiarotnikami. Pakistanskija ŭłady abvinavačvajuć «Taliban» u tym, što jon nie pieraškadžaje bajevikam pierasiakać miažu i dziejničać na pakistanskaj terytoryi. Afhanski bok hetyja abvinavačańni adchilaje.
.
Kamientary