Biełarusa niekalki miesiacaŭ pierakidali ad doktara da doktara i nie chacieli špitalizavać, pakul naha nie pačała hnić

Žudasnaj historyjaj pra toje, jak čałaviek ledź nie straciŭ nahu praz abyjakavaść i biurakratyju ŭ sistemie achovy zdaroŭja, padzialiłasia «Minskaja praŭda».

Pavieł Mikałajevič (imia źmienienaje) pryznajecca, što zvyčajna nie chodzić da daktaroŭ i lečycca sam — kuplaje leki ŭ aptecy, bo nie vieryć maładym śpiecyjalistam. Ale viasnoj minułaha hoda, kali paśla liŭniaŭ jaho lecišča zatapiła, jon pracavaŭ niekalki hadzin u ledzianoj vadzie i nacior na nazie drapinu, jakuju prosta zakleiŭ płastyram. Praź niekalki dzion rana zapaliłasia i pačała baleć, a damašnija srodki — jod, zialonka, pierakis vadarodu — nie dapamahali.

«Bol uzmacniaŭsia, rana rasła. U aptecy paraili mazi — i darahija, i tannyja. Ničoha nie dziejničała: rana pavialičvałasia. Kali spačatku jana była ź piacikapieječnuju manietu, to praz try miesiacy — užo z dvuchrublovuju», — raskazvaje mužčyna.

Navat paśla hetaha mužčyna adkładaŭ vizit da lekara — pakul jaho nie prymusili žonka i dačka. Jany sami zapisali jaho da terapieŭta i pajšli razam.

Ale doktar ničoha novaha nie skazaŭ: paraiŭ nie mačyć nahu, rabić paviazki z maźziu i pić abiazbolvalnyja — toje, što Pavieł i tak rabiŭ.

Paśla hetaha jon jašče čatyry miesiacy ciarpieŭ bol, nie moh spać pa načach. Stan rany paharšaŭsia, pa słovach mužčyny, užo była bačnaja kość. 

«Heta ŭžo nie žarty: naha hniła! Pajšoŭ znoŭ da ŭčastkovaj — jana rukami razvodzić: «Heta nie da mianie, idzicie da chirurha». Chirurh — da reŭmatołaha, reŭmatołah — nazad da terapieŭta. Prasiŭ špitalizacyju — admovili: u rajonnaj nie zrobiać, u abłasnoj zapis tolki praz paŭhoda…»

U siaredzinie kastryčnika Paŭła narešcie špitalizavali ŭ rajonnuju balnicu. Tam jon zdaŭ analizy, prajšoŭ abśledavańnie, jamu stavili kropielnicy i pračyščali ranu siem dzion. Pa analizaŭ vynikach usio było adnosna dobra: cukar i chalesteryn u normie, pastavili dyjahnaz — trafičnaja jazva.

«Amal vypisali z rekamiendacyjaj «sprabujcie dačakacca čarhi ŭ abłasnoj»», — dzielicca ździŭleńniem mužčyna. 

Adnak užo na nastupny dzień usio źmianiłasia: padčas abchodu doktar paviedamiŭ, što paśla vychadnych Paŭła paviazuć u abłasnuju balnicu na chutkaj — usie dakumienty tudy ŭžo pierasłali, i tam pahadzilisia jaho pryniać.

Ciapier Pavieł u abłasnoj balnicy, dzie jamu zrabili poŭnaje abśledavańnie i apieracyju pa šunciravańni sasudaŭ nižnich kaniečnaściej, kab adnavić krovazvarot u nazie.

Praz try dni zapłanavanaja jašče adna apieracyja, paśla jakoj jaho vypišuć dadomu. Pavieł kaža, što rana pačała zaciahvacca, i choć pra poŭnaje vyzdaraŭleńnie kazać rana, prahnozy dobryja.

Jon pryznajecca: kali b rajonnaja balnica nie nakiravała na špitalizacyju ŭ abłasnuju balnicu, usio mahło skončycca amputacyjaj.

Jak musić być

Pavodle Pastanovy Ministerstva achovy zdaroŭja №137 ad 22 kastryčnika 2024 hoda, u Biełarusi ŭviedzieny novy paradak akazańnia i nakiravańnia pacyjentaŭ dla atrymańnia miedycynskaj dapamohi.

Zhodna z dakumientam, spačatku pacyjent idzie da ŭčastkovaha abo ŭrača ahulnaj praktyki, jaki stavić papiaredni dyjahnaz i vyrašaje, ci treba nakiravać jaho dalej.

Kali vypadak składany, dakumienty pierasyłajucca ŭ abłasnuju abo respublikanskuju ŭstanovu. Tam pavinny za try dni pryniać rašeńnie ab špitalizacyi, a kali patrebna tolki kansultacyja — za adzin dzień.

Zvyčajnyja abśledavańni, jak UHD, analizy ci hastraskapija, pravodziacca ŭ svajoj paliklinicy, biez pajezdak u vobłaść.

Akramia taho, pastanova abaviazvaje miedustanovy infarmavać hramadzian, dzie i kali jany mohuć atrymać dapamohu i da kaho źviartacca ŭ vypadku składanaściaŭ.

• 0
• 0
• 1
• 9
• 9
• 5
• 7
• 0