Syrski raskazaŭ, jak rasijanie daviedalisia pra zbor vajskoŭcaŭ u Dnieprapiatroŭskaj vobłaści. Zahinuli 19 čałaviek
Hałoŭnakamandujučy Uzbrojenymi siłami Ukrainy Alaksandr Syrski zajaviŭ, što rasijanie daviedalisia pra vajskovy zbor u Dnieprapiatroŭskaj vobłaści 1 listapada, dzie ŭ vyniku rakietnaha ŭdaru zahinuli 19 čałaviek, z hrupavoha čata ŭkrainskich vajskoŭcaŭ u sacyjalnych sietkach. Pra heta raskazała viadučaja TSN Ała Mazur u efiry telemarafonu sa spasyłkaj na kamientar Syrskaha joj, piša «Ukrainskaja praŭda».
«Prablema nie tolki ŭ tym, što była parušanaja zabarona na śviatkavańnie na froncie, — skazaŭ hałoŭnakamandujučy. — Znoŭ byŭ hrupavy čat u sacyjalnych sietkach, i heta ihnaravańnie banalnych standartaŭ biaśpieki. Bo mienavita praz uzłom sietak rasijanie, chutčej za ŭsio, daviedalisia pra schod, miarkuje Syrski», — skazała viadučaja.
Syrski adznačyŭ, što na dniach hetaja trahiedyja abmiarkoŭvałasia z kamandzirami korpusaŭ, i dyscyplinarnyja rašeńni pavinny źvieści da nula šancy znoŭ padstavicca vorahu, raskazała viadučaja.
2 listapada hrupoŭka vojskaŭ «Uschod» paviedamiła, što ŭ vyniku varožaha ŭdaru 1 listapada ŭ Dnieprapiatroŭskaj vobłaści siarod vajskoŭcaŭ Uzbrojenych Sił jość zahinułyja i paranienyja.
Žurnalist TSN Dźmitryj Śviatnienka paviedamiŭ, što jahony brat-vajskoviec zahinuŭ, kali rasijskaja balistyčnaja rakieta ŭpała na miesca, dzie prachodziła cyrymonija ŭznaharodžańnia bajcoŭ.
Supracoŭniki Dziaržaŭnaha biuro rasśledavańniaŭ paviedamili kamandziru bataljona ab padazreńni pavodle častki 4 artykuła 425 Kryminalnaha kodeksa Ukrainy — chałatnaje staŭleńnie da vajskovaj słužby, učynienaje va ŭmovach vajennaha stanovišča.
8 listapada Centralny rajonny sud Dniapra abraŭ jamu mieru strymańnia ŭ vyhladzie ŭtrymańnia pad vartaj.
Pavodle źviestak Hienieralnaj prakuratury, u vyniku ŭdaru 1 listapada zahinuli 12 vajskoŭcaŭ i 7 mirnych žycharoŭ. Jašče 36 vajskoŭcaŭ atrymali ranieńni.
Kamientary