Kakava pry siadziačaj pracy ratuje lepš za fitnes? Niečakanyja vyniki daśledavańnia

My pravodzim siedziačy ŭ siarednim pa 8—9 hadzin u dzień, a niekatoryja — navat usie 12. Doŭhaje siadzieńnie škodzić našym sasudam: jany stanoviacca mienš ełastyčnymi, a ŭnutrany płast kletak — endatelij, jaki pakryvaje ścienki sasudaŭ i adkazvaje za ich zdaroŭje, — pačynaje pracavać horš. Heta pavyšaje ryzyku sardečnych zachvorvańniaŭ i vysokaha kryvianoha cisku navat siarod tych, chto rehularna zajmajecca sportam.

Navukoŭcy vyjavili, što ŭ maładych mužčyn z vydatnaj sardečna-sasudzistaj padrychtoŭkaj paśla dźviuch hadzin siadzieńnia ŭźnikali tyja ž prablemy z kryvianosnymi sasudami, što i ŭ ich mienš padciahnutych adnahodkaŭ.

Vychodzić, što prablemy z sercam niepaźbiežnyja? Na ščaście, niadaŭna źjaviłasia novaja nadzieja. Jak piša Study Finds, hrupa navukoŭcaŭ ź Birminhiemskaha ŭniviersiteta vyrašyła pravieryć, ci mohuć pradukty, bahatyja na fłavanoidy (rečyvy, jakich šmat u kakavie), praduchilić paharšeńnie pracy sasudaŭ padčas doŭhaha siadzieńnia.

Ideja ŭźnikła nie vypadkova: apošnija dziesiacihodździ navuka pakazała, što raślinnyja palifienoły, asabliva fłavanoidy, źnižajuć ryzyku sardečna-sasudzistych zachvorvańniaŭ, palapšajučy pracu endateliju.

Kali fitnes nie maje značeńnia

U daśledavańni pryniali ŭdzieł sorak maładych mužčyn. Pałova ź ich mieła pikavyja ŭzroŭni spažyvańnia kisłarodu (56 mililitraŭ kisłarodu ŭ chvilinu na kožny kiłahram svajoj vahi), charakternyja dla ludziej, jakija rehularna biehajuć abo jeździać na rovary. Druhaja pałova mieła bolš typovy ŭzrovień fizičnaj padrychtoŭki — mienš za 41 mililitr na kiłahram.

Kožny ŭdzielnik prajšoŭ dźvie siesii 2‑ch hadzinnaha siadzieńnia ź pierapynkam nie mienš za tydzień. Pierad kožnaj siesijaj jany vypivali albo kakava-napoj z vysokim utrymańniem fłavanoidaŭ (695 mh), albo amal identyčny nizkafłavanoidny (usiaho 5,6 mh).

Navukoŭcy vymiarali, nakolki dobra pracujuć sasudy, vykarystoŭvajučy mietad, jaki nazyvajecca płyniezaležnaj dyłatacyjaj (PZD). Hety test praviaraje, jak arteryi pašyrajucca pry pavieličeńni kryvacioku.

Paśla dźviuch hadzin bieśpierapynnaha siadzieńnia va ŭdzielnikaŭ, jakija pili nizkafłavanoidny napoj, funkcyja kryvianosnych sasudaŭ pahoršyłasia ŭ abiedźviuch arteryjach (plečavoj i ściehnavoj), niezaležna ad uzroŭniu fizičnaj padrychtoŭki.

U plečavaj arteryi funkcyja źniziłasia na 0,6% u vysokapadrychtavanych i na 0,7% u mienš fizična padrychtavanych mužčyn u paraŭnańni ź ich pačatkovymi vymiareńniami. Ściehnavaja arteryja paciarpieła jašče bolš, źniziŭšysia prykładna na 1% u abiedźviuch hrupach.

Hetyja pracenty majuć vialikaje značeńnie: daśledavańni pakazvajuć, što palapšeńnie pakazčyka PZD na 1% źnižaje ryzyku sardečnych zachvorvańniaŭ jak minimum na 9%. Adpaviedna, źnižeńnie, vyklikanaje siadzieńniem, moža istotna pavysić ryzyku ź ciaham času.

Jak kakava ŭsio źmianiła

Napoj z fłavanoidami pakazaŭ zusim inšuju karcinu. Udzielniki, jakija spažyvali vysokafłavanoidnuju kakavu pierad siadzieńniem, zachavali svaju pačatkovuju funkcyju sasudaŭ u abiedźviuch arteryjach na praciahu dźviuch hadzin, nie ŭstajučy ź miesca. Zamiest taho, kab źnižacca, ich pakazčyki zastavalisia stabilnymi ci navat trochi pavialičvalisia.

Fłavanoidy kakavy, vidavočna, dziejničajuć inakš, čym fizičnaja aktyŭnaść. U toj čas jak pierapynki na chadu palapšajuć funkcyju sasudaŭ, pakolki ruch pavialičvaje kryvaciok, fłavanoidy zachavali funkcyju sasudaŭ bieź źmieny kryvacioku. Heta śviedčyć ab tym, što jany pracujuć na bijachimičnym uzroŭni.

Jak tłumačać vučonyja, kali čałaviek doŭha siadzić, kryviany tok u nahach zapavolvajecca, i ścienki sasudaŭ atrymlivajuć mienš miechaničnaj stymulacyi, jakaja padtrymlivaje ich ełastyčnaść. Z-za hetaha źnižajecca vypracoŭka aksidu azotu — malekuły, jakaja padtrymlivaje zdaroŭje sasudaŭ, pieraškadžaje ŭtvareńniu trombaŭ i pryhniataje zapalenčyja pracesy.

Fłavanoidy, u tym liku epikatechin, jakija jość u kakavie, pavialičvajuć vypracoŭku aksidu azotu i adnačasova źnižajuć kolkaść endatelinu-1, rečyva, jakoje prymušaje sasudy zvužacca. U vyniku sasudy rassłablajucca, palapšajecca kryvaciok, źnižajecca cisk i pahroza zapaleńnia.

Doza fłavanoidaŭ, vykarystanaja ŭ daśledavańni (150 mh epikatechinu), adpaviadaje toj, jakuju možna atrymać ź ježy. Padobnuju kolkaść moža dać kubak napoju ź nieapracavanaha kakava-parašku, niekatoryja vidy ciomnaha šakaładu, a taksama niekalki porcyj zialonaha čaju, jahad abo jabłykaŭ na praciahu dnia.

Ale jość niuans: kryviany cisk

Situacyja z kryvianym ciskam była bolš tryvožnaj. Siadzieńnie pavysiła dyjastaličny cisk (nižni pakazčyk) na 2,4 da 5,8 mm irtutnaha słupka va ŭsich udzielnikaŭ. Heta pavieličeńnie adbyłosia niezaležna ad spažyvańnia fłavanoidaŭ abo ŭzroŭniu fizičnaj padrychtoŭki.

Fłavanoidy nie zmahli praduchilić hetyja skački cisku, što śviedčyć ab tym, što ich karyść raspaŭsiudžvajecca tolki na niekatoryja aśpiekty zdaroŭja sasudaŭ. Daśledčyki miarkujuć, što dla abarony ad pavyšeńnia cisku padčas siadzieńnia moža spatrebicca pryjom dabavak nie hadzinami, a tydniami.

Vysnovy dla realnaha žyćcia

Toj fakt, što fitnes nie abaraniaje ad vostraha paškodžańnia sasudaŭ, maje značeńnie dla našaha ŭjaŭleńnia pra zdaroŭje. Fizičnyja praktykavańni zastajucca važnymi dla ahulnaha zdaroŭja serca i daŭhalećcia, ale danyja pakazvajuć, što navat spartsmieny nie mohuć paźbiehnuć niehatyŭnych nastupstvaŭ doŭhaha siadzieńnia.

Dla tych, chto siadzić šeść i bolš hadzin štodnia, spałučeńnie pierapynkaŭ dla ruchu sa spažyvańniem fłavanoidaŭ moža dać bolš abarony, čym luby z hetych padychodaŭ paasobku.

Adnak złoŭžyvać kakavaj nie rekamiendujecca. Hety napoj vysokakałaryjny, asabliva z cukram, a vysokija dozy fłavanoidaŭ mohuć mieć pabočnyja dziejańni.

• 3
• 0
• 1
• 0
• 2
• 1
• 0
• 2