«Zapčastki dla ludziej» — vučonyja vyroščvajuć kryvianosnyja sasudy ŭ łabaratoryi

Pra novaje dasiahnieńnie ŭ śfiery bijatechnałohij raskazvaje vydańnie The Wall Street Journal. Vučonyja z kampanii Humacyte, jakaja znachodzicca ŭ ZŠA, zdoleli ŭ svajoj łabaratoryi vyraścić kryvianosnyja sasudy, kab dapamahčy pacyjentam, u jakich jany byli paškodžanyja ŭ vyniku traŭmy.

Dla taho kab stvaryć sasud, vykarystoŭvajuć 40-santymietrovuju trubku z płastykavaj sietki, jakuju źmiaščajuć u pakiet, napoŭnieny pažyŭnymi rečyvami, što stymulujuć rost kletak (białki, vitaminy, minierały, hlukoza). Zatym u pakiet dadajuć kletki kryvianosnych sasudaŭ ad donaraŭ, jakija pačynajuć farmiravać kryvianosny sasud.

Na praciahu dvuch miesiacaŭ kletki stvarajuć čałaviečuju arteryju, tryvałaść jakoj nadaje kałahien. U toj ža čas płastykavy karkas pastupova rastvarajecca. Paśla hetaha z dapamohaj śpiecyjalnaha myjnaha srodku na praciahu piaci dzion novy sasud pramyvajuć, kab pazbavicca ad žyvych kletak.

U vyniku vučonyja atrymlivajuć blednuju biełuju trubku, jakaja pracuje jak kryvianosny sasud. Jana atrymała nazvu «biaskletačny tkankainžynierny sasud». Im zamianiajuć paškodžany ŭčastak sasuda, i pastupova ŭłasnyja kletki pacyjenta zasialajuć jaho.

Aŭtary raspracoŭki adznačajuć, što vyraščany ŭ ich łabaratoryi sasud nie patrabuje razmarožvańnia ci hidratacyi, jak heta adbyvajecca ź niekatorymi inšymi typami tkanak i praduktaŭ kryvi.

Kampanija ŭžo praviała pieršyja testy na pacyjentach. Imi stali 69 čałaviek u ZŠA i Izraili z traŭmami ad ahniastrelnaj zbroi, niaščasnych vypadkaŭ na pracoŭnym miescy, aŭtamabilnych avaryj i inšych.

Taksama biaskletačny tkankainžynierny sasud kampanii Humacyte byŭ vykarystany pry lačeńni 19 paranienych ukrainskich sałdat u ramkach śpiecyjalnaj humanitarnaj prahramy, jakaja była ŭchvalenaja Upraŭleńniem pa sanitarnym nahladzie za jakaściu praduktaŭ i miedykamientaŭ ZŠA (FDA). Śpiecyjalisty Humacyte kansultavali ŭkrainskich chirurhaŭ praz Zoom.

Ciapier kampanija vyvučaje, ci mohuć ich kryvianosnyja sasudy dapamahčy ludziam, jakija prachodziać dyjaliz. Takim pacyjentam časta davodzicca karystacca płastykavymi katetarami, što moža pryvieści da infiekcyj. Jany taksama testujuć svaju raspracoŭku na ludziach z zachvorvańniem pieryfieryčnych arteryj, jakoje vyklikaje bol ad zvužanych kryvianosnych sasudaŭ.

U kampanii taksama vykazvajuć nadzieju, što ich biaskletačny tkankainžynierny sasud zmoža dapamahčy pacyjentam pry šuntavańni serca. Ciapier hetaja pracedura praduhledžvaje zabirańnie častki arteryi ci vieny ź inšaha miesca cieła i ŭšyvańnie jaje ŭ serca, kab abyści zabłakavany sasud. Vyraščanyja ŭ łabaratoryi sasudy mohuć zrabić taki pieraščep niepatrebnym.

• 9
• 0
• 1
• 0
• 0
• 0
• 0
• 0