Cichanoŭskaja sustrełasia z premjeram Aŭstralii. Toj byŭ ź miłym dziciačym branzaletam na rucie, a syšoŭ jašče i z BČB
Upieršyniu aŭstralijski premjer prymaje biełaruskaha palityka na takim uzroŭni.
Śviatłana Cichanoŭskaja padčas vizitu ŭ Aŭstraliju sustrełasia 6 listapada z premjer-ministram krainy Entani Ałbanizam. Upieršyniu aŭstralijski premjer prymaje biełaruskaha palityka na takim uzroŭni.
Ałbaniz vykazaŭ padtrymku biełaruskamu narodu i biełaruskim demakratyčnym siłam. Padčas razmovy baki abmierkavali situacyju ŭ Biełarusi, vajnu Rasii suprać Ukrainy, padtrymku dla represavanych i sankcyjnuju palityku. Śviatłana Cichanoŭskaja zaklikała adroźnivać režym i biełarusaŭ, Biełaruś i Rasiju.
Jana padziakavała premjer-ministru i ŭradu Aŭstralii za pryncypovuju pazicyju ŭ padtrymcy Ukrainy i za ŭvahu da situacyi ŭ Biełarusi.
Cichanoŭskaja raspaviała ab prablemach biełaruskaj dyjaspary ŭ Aŭstralii, a taksama supolnych histaryčnych suviaziach. Abmierkavali mahčymaści naładžvańnia kantaktaŭ z krainami Cichaakijanskaha rehijona, a taksama Sinhapuram, Japonijaj, i Karejaj.
Na adnym z fota ŭ rukach u premjera bačny bieła-čyrvona-bieły branzalet. Adkul jon?
Daradca Cichanoŭskaj Dzianis Kučynski raskazaŭ, što padčas sustrečy Cichanoŭskaja zaŭvažyła ŭ premjer-ministra inšy branzalet, padobny da ručnoj pracy, i zapytałasia pra jaho. Akazałasia, heta byŭ padarunak ad maleńkaj dziaŭčynki, jakaja naviedvała parłamient i zrabiła branzalet dla premjera ź jahonym imiem.
Zvyčajna takija žesty, jak padarunki, pa dypłamatyčnym pratakole zahadzia ŭzhadniajucca. Ale tut, kaža Kučynski, byŭ prydatny momant, kab zrabić simvaličny padarunak.
«Cichanoŭskaja padaryła premjer-ministru branzalet ź bieła-čyrvona-biełym ściaham i koratka raskazała historyju našaj simvoliki — pra BČB, «Pahoniu», pra toje, što jana značyć dla biełarusaŭ i čamu hetak važna zachoŭvać svaju historyju nasupierak sprobam režymu jaje źniščyć.
Premjer-ministr ź vialikaj cikavaściu ŭspryniaŭ hety žest, skazaŭšy, što pojdzie ź im na siesiju pytańniaŭ i adkazaŭ u Parłamiencie, i paabiacaŭšy nasić branzalet jak znak padtrymki i salidarnaści ź biełaruskim narodam».
Aŭstralija ŭvachodzić u hrupu G-20 najbolšych ekanomik śvietu.
«Tamu takaja sustreča maje asablivuju vahu, — kaža Kučynski. — Sam fakt, što pieramovy prajšli ŭ ofisie kiraŭnika ŭrada, padkreślivaje pryznańnie Śviatłany Cichanoŭskaj jak abranaj lidarki biełaruskaha naroda i cikavaść Aŭstralii da losu Biełarusi».
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary