Sud pryniaŭ rašeńnie admović u departacyi demakratyčnaha aktyvista Artura Sieńko ŭ Biełaruś i dać jamu palityčny prytułak, piša Reform.news.
Sud prachodziŭ u štacie Ńju-Mieksika, u Cibola County Correctional Center. Heta turma, častka jakoj vykarystoŭvajecca ICE dla ŭtrymańnia mihrantaŭ pad staršynstvam sudździ Samuela Uiljamsa.
«Niezadoŭha da majho zatrymańnia ŭ imihracyjnaj turmie moj blizki siabar Jaŭhien Ždanovič zasnavaŭ inicyjatyvu byaction.org — dla dapamohi tym, chto prosić prytułku ź Biełarusi ŭ ZŠA. Pa ironii losu, ja staŭ pieršym, chto apynuŭsia pad apiekaj hetaj inicyjatyvy. Moj sud prachodziŭ u štacie Ńju-Mieksika, u Cibola County Correctional Center. Heta turma, častka jakoj vykarystoŭvajecca ICE dla ŭtrymańnia mihrantaŭ.
Nam udałosia damahčysia ŭpeŭnienaj pieramohi ŭ adnoj z samych składanych dla tych, chto prosić prytułku, jurysdykcyj — 10‑j akruzie — u vielmi niespryjalny dla imihrantaŭ čas. Pryčyna, pa jakoj ja znoŭ u biaśpiecy i na svabodzie, šmat u čym zaklučajecca ŭ kałasalnaj padtrymcy mnostva ludziej.
Ja biaskonca ŭdziačny: Siarhieju Cichanoŭskamu, Alaksandru Atroščankavu, Andreju Hniotu, Hańnie Macijeŭskaj — za toje, što zmahalisia za mianie da apošniaj chviliny pierad vyniasieńniem rašeńnia. Ja ŭdziačny pravaabarončym arhanizacyjam Human Constanta, «Viasna», «Pravavaja Inicyjatyva», «Miemaryjał» — za pravavy analiz.
Ja ŭdziačny Ofisu Śviatłany Cichanoŭskaj, Narodnamu Antykryzisnamu Upraŭleńniu, Kaardynacyjnaj radzie, Abjadnanamu pierachodnamu kabinietu — za dypłamatyčnyja namahańni. Vydańniam Reform.news, Zerkalo.io, Euroradio.fm, Nashaniva.com, Gazetaby.com, Svaboda.org, POLITICO — za aśviatleńnie majoj situacyi. I viadoma ja ŭdziačny ŭradu ZŠA — za mahčymaść spraviadlivaha razhladu majoj spravy i pradastaŭleńnia mnie abarony», — skazaŭ Artur Siańko Reform.news.
Artur Siańko byŭ pad vartaj z 15 žniŭnia. Biełarus znachodziŭsia na terytoryi ZŠA lehalna. 26 žniŭnia 2021 hoda Artur Siańko prybyŭ u punkt propusku ŭ Otay Mesa Port of Entry, štat Kalifornija, dzie zajaviŭ ab aściarozie pieraśledu i paprasiŭ palityčnaha prytułku.
Takaja pracedura praduhledžana Zakonam ab imihracyi i hramadzianstvie. Artur Siańko minimum z 2022 hoda znachodzicca ŭ miždziaržaŭnym vyšuku pa palityčnym artykule 369 KK RB — abraza pradstaŭnika ŭłady.
Praz dva dni paśla prybyćcia ŭ ZŠA jon byŭ vyzvaleny da dalejšaha razboru biez daty pryznačeńnia suda. Paśla čaho padaŭ piśmovaje paviedamleńnie ab pradastaŭleńni palityčnaha prytułku, a taksama na praciahu ŭsiaho času znachodžańnia ŭ ZŠA supracoŭničaŭ ź mihracyjnymi orhanami, pradstaŭlaŭ kantaktnyja dadzienyja i dadzienyja ab miescy svajho znachodžańnia.
15 žniŭnia 2025 hoda jon byŭ vyklikany pozvaj u pradstaŭnictva Departamienta ŭnutranaj biaśpieki (U.S. Department of Homeland Security) u Ńju-Jorku. Artur Siańko prybyŭ na miesca z advakatam. Dovady i arhumienty advakata ab zakonnym znachodžańni ŭ ZŠA Artura Siańko jak taho, chto prosić prytułku, nie byli pryniaty. Imihracyjnyja aficery admovilisia hladzieć dakumienty.
Arturu Siańko nadzieli kajdanki i supravadzili ŭ izalatar. Akramia taho, supracoŭniki mihracyjnaj słužby prapanavali biełarusu padpisać dakumient ab tym, što data, miesca i abstaviny jaho prybyćcia na terytoryju ZŠA nieviadomyja, ad čaho jon admoviŭsia, tak jak, na jaho dumku, heta supiarečyć sapraŭdnaści. Paśla rašeńnia suda jon byŭ vyzvaleny i znachodzicca ŭ siabie doma ŭ Ńju-Jorku.
Kamientary