Ryžankoŭ pra zakryćcio Litvoj miažy: Heta pravakacyi dla apraŭdańnia antybiełaruskich, antyrasijskich padychodaŭ
Ministr zamiežnych spraŭ Biełarusi Maksim Ryžankoŭ zajaviŭ, što nie bačyć abjektyŭnych pryčyn dla zakryćcia miežaŭ Litvoju, i rascaniŭ dziejańni Vilni jak pošuk nahody dla apraŭdańnia antybiełaruskich i antyrasijskich padychodaŭ.
«Nu, heta niejkija pravakacyi. To bok, kali kamuści treba znajści nahodu, kab niejak voś hetaj rytorykaj apraŭdać svaje niejkija dziejańni suprać Biełarusi, suprać Rasii, u kančatkovym vyniku i suprać svaich hramadzian, to voś šukajuć takija voś nahody», — skazaŭ jon.
Jon kaža, što šary z kantrabandaj cyharet «usio žyćcio lotali». Pavodle jaho słoŭ, treba, kab Litva sa svajho boku litoŭskich kantrabandystaŭ zatrymlivała. «Dyk vy ź imi raźbirajciesia. Voś raźbieraciesia, pieramožacie ŭ siabie kantrabandu, — dyk nie budzie takich pytańniaŭ», — skazaŭ jon.
Ryžankoŭ schłusiŭ, što litoŭski bok nijakich pretenzij da Biełarusi z nahody mieteazondaŭ nie dasyłała.
«Ale samaje cikavaje, što nam anijakich not nie pasyłałasia», — skazaŭ Ryžankoŭ (nasamreč Litva niekalki not pratestu napraviła z hetaj nahody ŭ biełaruski MZS).
Ryžankoŭ śćviardžaje, što ŭsia heta situacyja — pravakacyi litoŭskaha boku.
«Usio heta padobna na niejkija pravakacyi, jakija majuć metaj apraŭdańnie niejkich antybiełaruskich, antyrasijskich padychodaŭ, za jakimi mohuć być i spynieńnie tranzitu ŭ Kalininhradskuju vobłaść, i dalejšaje abmiežavańnie na pralot samalotaŭ — to bok voś pahladzicie, jakija tut kala nas varvary, jakija niezrazumieła čym zajmajucca. Voś dla hetaha ŭsio heta i robicca.
To bok, vobrazna kažučy, abhruntavać svajmu narodu niejkija dziejańni antybiełaruskaha, antyrasijskaha charaktaru — heta ciažka. Tamu treba naskrebci niejkaha takoha niehatyvu, na fonie jakoha byccam by zapałochany (mienavita zapałochany) žychar Litvy, jaki budzie ŭ hłybini dušy choć i pieražyvać za toje, što, značyć, voś takaja nahniatajecca situacyja, što treba šukać, biehčy dzieści šukać niejkaje bambaschovišča, zapasacca niejkimi praduktami, ale budzie padtrymlivać dziejańni ŭłady, tamu što, nu, heta ž sapraŭdy pahroza z Uschodu», — patłumačyŭ svajo bačańnie situacyi Ryžankoŭ.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro13
Kamientary