Ajcišniki-mužčyny masava pačali rabić botaks i płastyčnyja apieracyi — novy trend Kremnijevaj daliny
U śviecie, dzie technałohii asacyjujucca z maładościu, mužčyny-ajcišniki znajšli novy sposab zastavacca ŭ hulni — płastyčnuju chirurhiju. Kab zmahacca z ejdžyzmam i stracham stracić pracu, top-mieniedžary i inviestary vydatkoŭvajuć dziasiatki, a časam i sotni tysiač dalaraŭ na padciažki tvaru, šyi i karekcyju paviekaŭ. Pra niečakany fienomien, jaki nabiraje abaroty ŭ Kremnijevaj dalinie, piša The Wall Street Journal.
«Naša hramadstva tradycyjna patrabavała maładości ad žančyn, ale ciapier hety cisk adčuvajuć usie — asabliva ŭ IT-śfiery, dzie ciabie chutka paznačać jak «nieaktualnaha», kali ty vyhladaješ starym», — cytuje vydańnie doktara Cimaci Martena, płastyčnaha chirurha z San-Francyska.
I heta nie prosta słovy. Jak raskazaŭ žurnalistam doktar Ben Talej ź Bievierli-Chiłz, čyje pasłuhi pa kompleksnaj padciažcy tvaru i šyi kaštujuć ad $125 000 da $150 000,
za apošnija piać hadoŭ popyt z boku mužčyn z technałahičnaha siektara vyras u piać razoŭ.
Jaho kaleha z San-Francyska, doktar Endru Barniet, śćviardžaje, što kolkaść zapytaŭ na padciažku tvaru ad ajcišnikaŭ padskočyła na 25% u paraŭnańni z dakavidnymi časami, a na apieracyi na paviekach — ažno na 50%. Najbolšy rost jon bačyć siarod mužčyn sa śfiery vienčurnaha kapitału i pryvatnych inviestycyjnych fondaŭ.
Što vyklikała hety bum?
Chirurhi vyłučajuć niekalki faktaraŭ: papularnaść preparataŭ dla pachudzieńnia nakštałt «Aziempiku», pandemija i šalony cisk zastavacca maładym na kankurentnym rynku pracy.
«Paśla COVID-19 płastyčnaja chirurhija pieražyła sapraŭdny vybuch», — cytuje vydańnie płastyčnaha chirurha Sinciju Hudman. Jak jana tłumačyć, ludzi pačali ŭhladacca ŭ svaje tvary padčas biaskoncych Zoom-kanfierencyj. A hibrydny režym pracy, jaki tak palubili ŭ IT, daŭ mahčymaść spakojna adnavicca paśla apieracyi doma, nie pryciahvajučy lišniaj uvahi.
Psichaanalityk Styvien Sabin z San-Francyska ŭ svaju čarhu adznačaje: jaho klijenty-mužčyny z IT-śfiery vykazvajuć zakłapočanaść nakont «stareńnia i straty aktualnaści». Mnohija źviartajucca da kaśmietyčnych pracedur.
Pačynałasia ŭsio z botaksu, jaki ŭ Kremnijevaj dalinie staŭ nastolki zvykłym, što heta «amal što ŭčorašni dzień». Pytańnie ciapier staić inakš: «A čamu ty jašče nie robiš toje, što dapamoža tabie adčuvać siabie lepš?»
Botaks, mini-padciažki, płastyka paviekaŭ
Pa słovach Sincii Hudman, mužčyny va ŭzroście 30+ zvyčajna pačynajuć ź niechirurhičnych pracedur — botaksu i fileraŭ. A ŭ 40 hadoŭ jany ŭžo hatovyja da bolš surjoznych krokaŭ, uklučajučy tak zvanyja «mini-padciažki». Heta apieracyja ź mienšaj kolkaściu razrezaŭ i bolš karotkim pieryjadam adnaŭleńnia (7‑10 dzion zamiest 2‑3 tydniaŭ), jakaja karektuje ŭ asnoŭnym nižniuju častku tvaru.
«Nichto nie choča mieć «pieraciahnuty» vyhlad, jak paśla starych apieracyj», — tłumačyć Hudman, čyja viersija mini-padciažki kaštuje ad $15 000.
«Raniej mužčyny čakali da 60‑70 hadoŭ, rabili padciažku, i ŭsie kazali: «Oho, jak vydatna vyhladaje!». Ciapier jany imknucca dziejničać na apiaredžańnie ŭ 40‑50 hadoŭ. Heta chutčej rańniaje absłuhoŭvańnie, čym poźni ramont», —
dadaje doktar Marten. Jaho pacyjenty siońnia chočuć naturalny i, što važna, nieprykmietny vynik.
Adna z samych papularnych pracedur — płastyka paviekaŭ (blefarapłastyka), jakaja prybiraje miaški pad vačyma i navisajučuju skuru.
«Bolšaść mužčyn z IT prychodziać mienavita pa heta», — kaža chirurh Arman Sierabrakian, jaki biare prykładna 5000—7000 dalaraŭ za apieracyju na vierchnim pavieku i kala 8000—10 000 dalaraŭ za nižnija. Pa słovach lekaraŭ, hetaja karotkaja pracedura moža vizualna amaładzić čałavieka na 10 hadoŭ.
Novyja technałohii i prykład žonak
Adnoj z pryčyn rostu papularnaści apieracyj źjaŭlajecca raźvićcio miedycynskich technałohij. Pa słovach chirurhaŭ, novyja preparaty dazvalajuć značna pamienšyć siniaki i acioki, a značyć, i čas adnaŭleńnia. Udaskanalenyja mietodyki palapšajuć vyniki.
Naprykład, niekatorym pacyjentam dla stvareńnia bolš vyraznaj linii skivicy ciapier pamianšajuć pamier ślinnych załoz.
Cikava, što časta mužčyn natchniaje prykład ich žonak. «Jany bačać, što žonka zrabiła praceduru, i razumiejuć: «A heta nie tak strašna, i ty sapraŭdy vyhladaješ lepš»», —
kaža stylist Viktoryja Chičkok.
Jašče adzin faktar — papularnyja leki dla pachudzieńnia. Chutkaja strata vahi pryvodzić da abvisańnia skury na tvary, što i padšturchoŭvaje pacyjentaŭ da pachodu ŭ kabiniet chirurha.
Doktar Marten padsumoŭvaje źmieny, jakija naziraje za 30 hadoŭ praktyki: «Histaryčna, kali mužčyna byŭ paśpiachovym, jaho pavažali niezaležna ad źniešnaści. A žančyna, jakoj by talenavitaj jana ni była, pavinna była jašče i dobra vyhladać. Ciapier mužčyny adčuvajuć, što adnych tolki dasiahnieńniaŭ niedastatkova. Jany pavinny jašče i vyhladać adpaviedna».
Kremnijevaja dalina znachodzić Boha: jak technahihanty źviartajucca da relihii i pravych pohladaŭ
Novaja era płastyčnaj chirurhii: halivudskija zorki zaŭvažna źmianili vyhlad
Kitajanka zrabiła bolš za 100 płastyčnych apieracyj i ciapier vyhladaje tak
Kremnijevaja dalina apantana idejaj «bolš razumnych dziaciej» — ajcišniki płaciać šalonyja hrošy, kab mieć dzicia z bolšym IQ
Ciapier čytajuć
«Adnavili hramadski paradak, nie sastupiŭšy patrabavańniam novych vybaraŭ». Što piša Hrokipiedyja pra pratesty, Łukašenku, movu i jak dzielić spadčynu VKŁ1212
Kamientary