Tramp moža dać kožnamu žycharu Hrenłandyi pa 100 tysiač dalaraŭ za dałučeńnie da ZŠA
Administracyja prezidenta Donalda Trampa razhladaje ideju dałučeńnia Hrenłandyi da ZŠA, jakaja ŭsio bolš nabyvaje vyhlad sproby finansava zaachvocić miascovych žycharoŭ. Jak paviedamlaje Reuters, amierykanskija čynoŭniki abmiarkoŭvali mahčymaść adnarazovych vypłat nasielnictvu vostrava, kab schilić jaho da vychadu sa składu Danii i, mahčyma, dałučeńnia da Złučanych Štataŭ.
Kankretnyja sumy i schiema vypłat pakul nie vyznačanyja, ale, pavodle krynic Reuters, havorka išła pra vypłaty ad 10 da 100 tysiač dalaraŭ na čałavieka. Taki padychod razhladajecca jak adzin z varyjantaŭ «nabyćcia» Hrenłandyi, dzie žyvie kala 57 tysiač čałaviek.
Dziaržsakratar ZŠA Marka Rubia raniej zajaviŭ kanhresmienam, što Tramp sapraŭdy zacikaŭleny ŭ kupli vostrava, a žorstkaja rytoryka vykarystoŭvajecca jak srodak cisku na Daniju z metaj pačatku pieramoŭ na hety kont.
U Biełym domie abmiarkoŭvajucca roznyja scenary dałučeńnia Hrenłandyi, u tym liku i siłavy. Pres-sakratarka administracyi Trampa Kerałajn Levit adznačyła, što prezident i jahonaja kamanda razhladajuć uvieś śpiektr mahčymaściaŭ dla dasiahnieńnia hetaj źniešniepalityčnaj mety, i vykarystańnie ŭzbrojenych sił ZŠA tearetyčna taksama nie vyklučajecca.
Razam z tym Reuters padkreślivaje, što ideja pramych vypłat moža vyhladać zanadta mierkantylnaj i navat abraźlivaj dla hrenłandcaŭ. Nasielnictva vostrava daŭno abmiarkoŭvaje svaju ekanamičnuju zaležnaść ad Danii i časta vykazvaje žadańnie poŭnaj niezaležnaści.
Pavodle apytańnia 2025 hoda, 56% žycharoŭ byli hatovyja padtrymać niezaležnaść, a 28% vystupali suprać. Pry hetym 85% apytanych zajavili, što nie chočuć, kab Hrenłandyja stała častkaj ZŠA.
Kamientujučy zvarot Reuters adnosna abmierkavańniaŭ «kupli» vostrava i mahčymych vypłat jaho žycharam, Bieły dom abmiežavaŭsia spasyłkami na raniejšyja zajavy Levit i Rubia.
«Mnie nie patrebna mižnarodnaje prava — u mianie niama namieru pryčyniać ludziam škodu». Tramp patłumačyŭ, navošta jamu Hrenłandyja
«My nie pradajomsia». Što kažuć žychary Hrenłandyi pra cikavaść Trampa da vostrava
Rubia zajaviŭ, što ZŠA źbirajucca kupić Hrenłandyju, a nie zabirać jaje siłaj
Śpiecpasłańnik Trampa ŭ Hrenłandyi: Havorka pra niezaležnaść vostrava, a nie pra anieksiju
Kiraŭniki krain ES i Brytanii: Vyklučna Danija i Hrenłandyja majuć prava vyrašać pytańni, što tyčacca Danii i Hrenłandyi
Žonka daradcy Trampa apublikavała kartu Hrenłandyi ŭ kolerach ściaha ZŠA
Kamientary
Kali budzie referendum, miascovyja lohka mohuć abrać inšaha haspadara, za miest Danii, ZŠA. Da jašče i hrošy za heta atrymajuć.