U Polščy vydali padručnik dla vyvučeńnia biełaruskaj movy jak zamiežnaj. Jon pasuje i dla samanavučańnia
Novy navučalny dapamožnik pad nazvaj «Biełaruskaja mova. Praktykavańni i teksty dla čytańnia» vydadzieny kafiedraj biełarusistyki Varšaŭskaha ŭniviersiteta.
Kniha raźličanaja na tych, chto vyvučaje biełaruskuju movu jak zamiežnuju na pačatkovych i siarednich uzroŭniach (A1—B1), pra heta paviedamlaje aficyjnaja staronka kafiedry biełarusistyki Varšaŭskaha ŭniviersiteta.
Jaho aŭtarka — viadomaja movaznaŭca i vykładčyca ŭniviersiteta Volha Traciak. Jana viadomaja ŭ biełaruskaj dyjaspary jak aktyŭnaja papularyzatarka rodnaj movy: z 2019 hoda Volha źjaŭlajecca inicyjatarkaj i arhanizatarkaj mižnarodnaj akcyi «Biełaruskaja dyktoŭka» ŭ Varšavie, jakaja pravodzicca da Dnia rodnaj movy.
Taksama daśledčyca ŭvachodzić u Kamisiju siertyfikacyi vałodańnia biełaruskaj movaj i Hałoŭny kamitet Alimpijady biełaruskaj movy ŭ Polščy.
Novaje hruntoŭnaje vydańnie maje 330 staronak, na jakich źmieščana 150 praktykavańniaŭ i 50 tekstaŭ dla čytańnia. Jak adznačajuć u kafiedry, zadańni składzienyja takim čynam, kab pastupova i sistemna raźvivać moŭnyja kampietencyi: ad razumieńnia piśmovaha tekstu da pašyreńnia leksičnaha zapasu i pracy nad hramatykaj.
Važnaja asablivaść dapamožnika — univiersalnaść. Jon pasuje jak dla pracy z vykładčykam, tak i dla samastojnaha vyvučeńnia, bo da vydańnia dałučany kluč z adkazami dla samakantrolu.
Publikacyja prafinansavanaja Fondam dydaktyčnaj daskanałaści Fakulteta praktyčnaj linhvistyki Varšaŭskaha ŭniviersiteta.
Jak nabyć?
Zamović dapamožnik možna praz sakrataryjat kafiedry biełarusistyki, napisaŭšy na elektronnuju poštu: [email protected]. Zajaŭleny košt — 39 złotych (kala 9 jeŭra).
-
«Nie zapatrabavana». Ź viadomaha kafe Mon Nom na Traktarnym prybrali biełaruskamoŭnaje mieniu
-
Niejrasietki ŭsio jašče spatykajucca na biełaruskim maŭleńni. Biełarusy chočuć padaryć štučnamu intelektu idealny hołas
-
Junak raskazaŭ, jak kanśpiektavaŭ ruskamoŭnyja lekcyi biełaruskaj łacinkaj. Heta vyklikała damino ŭspaminaŭ z BNTU, BDTU i BDU
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary