Polšča rezka skaraciła vydaču mižnarodnaj abarony zamiežnikam, u tym liku biełarusam

Ukraincy jaje praktyčna nie atrymlivali. Heta vynikaje sa statystyki, apublikavanaj Upraŭleńniem pa spravach zamiežnikaŭ, paviedamlaje Most.

Jakaja situacyja z hramadzianami Biełarusi

U studzieni-vieraśni 2025 hoda biełarusy padali 2,3 tys. zajavaŭ na mižnarodnuju abaronu ŭ Polščy. 1,3 tys. čałaviek atrymali stanoŭčyja rašeńni i kala 100 — admovu. Jašče 100 spraŭ spynieny. Źviartajem uvahu, što dola stanoŭčych rašeńniaŭ pa-raniejšamu vielmi vialikaja — bolš za 85%.

Dla paraŭnańnia: za I paŭhodździe biełarusy padali 1,6 tys. zajavaŭ i atrymali 1 tys. stanoŭčych rašeńniaŭ. Heta značyć, što za apošnija try miesiacy — lipień—vierasień — mižnarodnuju abaronu dali tolki 300 biełarusam. A novych zvarotaŭ było 700.

Takim čynam, zajavy nazapašvajucca. U vieraśni pryniaty zakon, jakim zamarožanyja terminy razhladu spraŭ ab mižnarodnaj abaronie. Heta značyć, što spravy ŭsio jašče razhladajucca, ale Upraŭleńnie pa spravach zamiežnikaŭ nie abaviazana ŭkładvacca va ŭstanoŭlenyja terminy — 6 miesiacaŭ u ahulnym vypadku i 15 miesiacaŭ — u składanym abo pry vialikim napłyvie zajavaŭ.

Uvohule bačna, što Polšča rezka skaračaje prymianieńnie miechanizmu mižnarodnaj abarony. Naprykład, za 9 miesiacaŭ minułaha hoda jaje atrymali 2,1 tys. biełarusaŭ.

U toj ža čas možna prahnazavać, što patreba biełarusaŭ u hetym miechaniźmie budzie raści, bo ŭ kancy 2025 hoda i ŭ 2026 hodzie ŭ mnohich palitemihrantaŭ buduć zakančvacca trochhadovyja humanitarnyja vidy na žycharstva, jakija aktyŭna vydavalisia ŭ 2022—2023 hadach.

Jakaja situacyja z hramadzianami Ukrainy

Hramadzianie Ukrainy z pačatku 2025 hoda padali 6,2 tys. zajavaŭ ab mižnarodnaj abaronie. Stanoŭča razhledžany 1,5 tys. Stolki ž było i ŭ statystycy za I paŭhodździe. Heta značyć, što za apošnija try miesiacy ukraincam nie davali abo amal nie davali abaronu.

Za 9 miesiacaŭ u dačynieńni da hramadzian Ukrainy vynieśli 1,4 tys. admovaŭ, u tym liku kala 900 — za apošnija try miesiacy. Upraŭleńnie pa spravach zamiežnikaŭ dvojčy ŭ hetym hodzie vypuskała tłumačeńni, što vajna va Ukrainie i strach pierad pryzyvam u armiju nie źjaŭlajucca padstavami dla pryznańnia mižnarodnaj abarony. A asnoŭnyja pytańni vajennych biežancaŭ vyrašaje miechanizm časovaj abarony.

Jakaja situacyja z rasijanami i inšymi zamiežnikami

Usiaho za 9 miesiacaŭ zajavy ab mižnarodnaj abaronie padali 11,2 tys. zamiežnikaŭ, heta na 9% mienš, čym za toj ža pieryjad 2024 hoda. Sprava ŭ tym, što z 27 sakavika Polšča ŭviała abmiežavańnie na pryniaćcie zajavaŭ ab abaronie na miažy ź Biełaruśsiu. Ciapier takoje prava zastałosia tolki ŭ ŭraźlivych hrup asob. Raniej davoli vialiki patok zajavaŭ ad hramadzian Afryki i Blizkaha Uschodu pastupaŭ mienavita ź biełaruska-polskaj miažy, dzie praciahvajecca mihracyjny kryzis.

Akramia biełarusaŭ i ukraincaŭ, bujnoj hrupaj zajaŭnikaŭ źjaŭlajucca rasiejcy — kala 500 čałaviek. Abaronu atrymali tolki 70, admovy — kala 300.

Usiaho z pačatku hoda Upraŭleńnie pa spravach zamiežnikaŭ razhledzieła 7,6 tys. zajavaŭ i dało abaronu 3,1 tys. zamiežnikam. Pa vynikach I paŭhodździa kolkaść razhledžanych zajavaŭ składała 5,3 tys., a stanoŭčych rašeńniaŭ — 2,8 tys. Heta značyć, što za apošnija try miesiacy abaronu atrymali tolki kala 300 zamiežnikaŭ. Prykładna stolki ž biełarusaŭ atrymali abaronu. To bok u asnoŭnym abaronu ŭ Polščy ciapier atrymlivajuć mienavita hramadzianie Biełarusi.

• 1
• 0
• 0
• 0
• 0
• 1
• 1
• 0