Tvor Śviatłany Aleksijevič staŭ krynicaj natchnieńnia dla amierykanskaha fentezi-bestselera

Raman «Alchemised» (litaralna — «Pieratvoranyja ałchimijaj»), jak piša The Guardian, staŭ fienomienam jašče da vychadu, pabiŭšy rekordy pa pieradzamovach u vydaviectvie Penguin i atrymaŭšy siamiznačnuju ździełku na ekranizacyju.

Šlach da pośpiechu ŭ 34‑hadovaj aŭtarki, jakaja piša pad tvorčym psieŭdanimam SenLinYu (jaho možna pierakłaści jak «Doždž u hustym lesie») i vykarystoŭvaje ŭ dačynieńni da siabie zajmieńniki they/them (jany), pačaŭsia padčas pandemii. Mienavita tady ŭ cichija chviliny, pakul spała jaje maleńkaje dzicia, jana pačała pisać raman prosta ŭ natatkach na telefonie.

Heta była nie aryhinalnaja historyja, a fanfik pa śviecie «Hary Potera» pad nazvaj «Manacled» (litaralna — «Skavanaja»). U im aŭtarka daśledavała zmročnyja i składanyja adnosiny pamiž Draka Małfojem i Hiermijonaj Hrejndžer va ŭmovach tatalitarnaha režymu, jaki pieramoh u vajnie čaraŭnikoŭ. Historyja, jakaja vykładvałasia ŭ internet raździeł za raździełam, chutka stała siensacyjaj i sabrała bolš za 20 miljonaŭ zahruzak.

Nievierahodnaja papularnaść «Manacled» pryciahnuła ŭvahu litaraturnych ahientaŭ, i SenLinYu atrymała prapanovu pieratvaryć fanfik u samastojny raman, vydaliŭšy ŭsie prykmiety čužoj intelektualnaj ułasnaści. Aŭtarcy daviałosia nie prosta źmianić imiony, a całkam pierabudavać śviet, stvaryŭšy z nula novuju sistemu mahii i łohiku suśvietu, kab zachavać dušu aryhinalnaj historyi.

SenLinYu's fantasy debut is the book everyone's talking about! An alchemist whose forgotten past may hold the Resistance's last secrets.#SenLinYu #EpicFantasy pic.twitter.com/TBzGESMwtR

— @PenguinBooksSA (@PenguinBooksSA) September 30, 2025

SenLinYu pryznajecca, što natchniałasia pracami pa žanočaj historyi, u pryvatnaści, knihaj Śviatłany Aleksijevič «U vajny nie žanočy tvar». Heta dapamahło joj pakazać nieparadny, štodzionny bok vajny i rolu žančyn u joj.

«U Supracivie było tak šmat žančyn, — adznačaje Sen. — U bajach ich było niašmat, ale paŭsiul u inšych miescach; jany pracavali ŭ špitalach, adpraŭlalisia na pieradavuju ŭ jakaści palavych miedykaŭ i vyciahvali paranienych u biaśpiečnaje miesca, byli radystkami, myli i ramantavali vopratku i formu, hatavali ježu. Usie zvyčajnyja zadačy, jakija nikoli nie zakančvalisia».

Admietna, što babula piśmieńnicy pa matčynaj linii razam z usioj svajoj siamjoj była internavanaja ŭ amierykanski łahier padčas Druhoj suśvietnaj vajny. Jaje adzinaj «vinoj» było japonskaje pachodžańnie.

Siužet ramana SenLinYu razhortvajecca vakoł vajennapałonnaj Chieleny Maryna, jakuju trymaje ŭ svaim zakinutym majontku jaje były adnakłaśnik — Kiejn Fieran. Jaho zadača — pranikać u śviadomaść žančyny ŭ pošukach stračanych uspaminaŭ.

Raman, jaki składajecca z troch častak, daśleduje zabłytanyja adnosiny pamiž hierojami ŭ śviecie niekramantyi i ałchimii, adnačasova padymajučy temy vajennaj traŭmy i ścirajučy miežy pamiž dabrom i złom

Choć u ŚMI «Alchemised» časta adnosiać da «ramantyčnaha fentezi», SenLinYu padkreślivaje, što nikoli nie imknułasia stvaryć «uzornuju» historyju kachańnia. Na sajcie knihi pieraličany šmatlikija papiaredžańni ab žorstkim źmieście, siarod jakoha — ekśpierymienty nad ludźmi, jaŭhienika, kanibalizm i niekrafilija.

Vyjšaŭšy sa śvietu fanfikaŭ, aŭtarka aktyŭna abaraniaje hety žanr ad źniavažlivaha staŭleńnia. Jana adznačaje, što papularnyja siońnia pierakazy hrečaskich mifaŭ nichto nie krytykuje za adsutnaść aryhinalnaści, u toj čas jak fanfiki sutykajucca z praduziataściu.

Pry hetym praces pieraŭtvareńnia ŭłasnaha fanfika ŭ samastojny raman jana nazvała «traŭmatyčnym», paraŭnaŭšy jaho sa sprobaj «sabrać novy pazł ź dźviuch roznych piacitysiačnych karobak». Tym nie mienš, vynik pieraŭzyšoŭ usie čakańni.

• 1
• 0
• 0
• 1
• 1
• 0
• 0
• 0